NATUMBAN ba kaha ni Secretary Adi Sitoy ang kalyo ni Speaker Bebot Alvarez nga gusto man kining wad-on na lang ang opisina sa Sugboanong opisyal?

Wala man kitay nabalitaan nga nangitag bikil si Sitoy. Gani, trabaho niini mao man ang pagsiguro nga maayo ang relasyon tali sa Kongreso ug Malakanyang.

Wala man sab kita makadungog nga nisawsaw si Secretary Sitoy sa isyu kabahin sa plunder case nga giatubang ni Speaker Alvarez tungodsa pagkaangin kaniya niadtong kaso kabahin sa Piatco ug ang kontrobersyal nga terminal sa Ninoy Aquino International Airport sa panahon ni presidente Gloria Macapagal-Arroyo.

Ang nakaapan ra ba niining Alvarez kay nisulay kini sa pagtangtang sa death penalty isip silot sa kasong plunder. Maayo na lang kay nasupalpal kini. Nagkanayon pa si Sen. Ping Lacson nga mas daghan pa ang napatay sa usa ka plunderer kay sa usa ka murderer.

Laing isyu sab nga ang girekrut ni Speaker Alvarez isip mahimong sakop sa PDP-Laban dinhi sa Syudad sa Sugbo mao ang mga kanhi tigsuporta ni bise presidente Jojo Binay, nga nagkapandolpandol sa miaging piliay tungod sa mga kasong pangurakot. Ang lider niining maong politikanhong grupo ginganlan sab ni Presidente Duterte nga drug lord protector.   

Basin og dunay kalambigitan sa gibuhat ni Speaker Alvarez ang politika sa Sugbo.

Cordova

Hinuon, atong nabantayan nga wa sab moapil si Sitoy og mga kontrobersiya sa politika dinhi sa lalawigan sa Sugbo.

Imbes pamulitika, atong na­a­ninaw nga si Sitoy nangusog karon aron matuman ang ikatulong taytayan nga magsumpay sa isla sa Mactan ug Sugbo.

Mahimo sab nato kining tawgon nga unang taytayan nga magsumpay sa lungsod sa Cordova ug Syudad sa Sugbo.

Kon matuman na ang maong proyekto, mausab ang papel sa Cordova kay mahimo na man kining agi-anan sa gikan sa Mactan nga molabang diretso sa SRP samtang entrada sab kini alang sa mga taga habagatan sa Sugbo nga moadtong sa Mactan-Cebu International Airport ug sa mga baybayon sa Mactan.

Di na man suok ang Cordova nga atong dalikyaton kon mangita og pagpabaskog sa tuhod nga mao ang bakasi.

Mas mopaspas na ang kalambuan sa Cordova ug hayag nga mahimo kining umaabot nga Charter City lakip na ang posibilidad nga laing congressional district.

CVRAA

Congratulations alang sa Niños tungod sa paglangkat niini sa labing daghang gold medals sa bag-o lang nahuman nga CVIRAA.

Congratulations sab nilang Mayor Kristine Chiong ug Val Chiong uban sa mga Naganhon nga malampusong nipahigayon sa maong athletic meet diha sa Syudad sa Naga.

Kon atong tan-awon, nakakulit na ang Naga sa kasaysayan isip usa ka venue sa mga dagkong mga sports events nga pangrehiyon.

Bunga kini sa VAL 2020 nga mao ang Vision and Leadership ni Mayor Val Chiong nga gipalapdan pa sa iyang anak nga si Mayor Kristine Chiong.

Samsam

Taudtaud na akong nakadungog niining hungihong nga basin modagan si Kong. Samsam Gullas alang sa pagka gobernador. Hinuon, kon ang maong scenario mahitabo ba karong 2019 o sa 2022 di pa kuno sigurado.

Ang nakapakgang sa maong plano mao kuno ang kawalay lig-on nga lider nga mahimong mabilin sa unang distrito.

Apan daw nausab na man ang kahimtang karong nakapakita si Mayor Kristine Chiong og talagsaong kakayahan.

Nakahibawo na man kita unsa ka loyal ang mga Chiong sa mga Gullas ug dili kini mosungag kanila.

Alang kanako, ang pagtumaw sa mga Chiong isip sinaligan nga mga lider sa mga Gullas diha sa distrito posibleng makapaaghat ni Samsam nga mosulay sa pagka gobernador.

@anol_cebu sa Twitter