DAVAO DEL NORTE -- Usa ka 18 anyos nga lalaki ang nasikop sa mga nagronda nga barangay tanod nga giingong misud og balay ug nangawat og mga hinalay.

Nahitabo ang insidente didto sa Visayan Village, siyudad sa Tagum, sa ala una sa kaadlawon kagahapon.

Naila ang nadakpan nga si Welson Alsado, molupyo sa Sinubong, Trento.

"Sori na. Wala nako tuyoa. Wala lang gyud koy kwarta," pangatarungan sa suspek sa dihang nahinabi sa Superbalita.

Sumala pa nga pagawas na sa gate sa panimalay sa usa ka June Dee Españo ang suspek dihang nakita siya sa mga tanod sa maong dapit.

Nakuha gikan sa iyang posisyon ang nagkalain-laing mga sinina nga di pa matino kon sa pamilyang Españo ba o sa uban pang mga silingan niini.

Nasayran nga misulay pa unta og dagan ang suspek, apan naapsiyan sa mga tanod ug gisignit.

"Adtong Huwebes sa gabii ra man ko miabot og Tagum. Padung unta ko og Davao para mangita og trabaho pero wala na koy kuwarta mao nga midiskarte na lang ko," saysay ni Alsado ngadto sa SuperBalita.

Dugang pa niya nga patay na matud pa ang iyang mga ginikanan ug wala na kini pamilya tungod ang iyang nailhang iyaan, usa kuno ka sakop sa New People's Army.

Girekrut matud pa siya sa mga rebelde mao nga napugos nga mokagiw sa ilang lugar. Nagtuo siya nga sa siyudad sa Davao siya makapangita og trabaho ug makasugod og maayong kinabuhi.

Nangayo karon og pasaylo ang dinakpan nga pasayluon siya aron nga makagawas sa prisohan. (Domilyn Ramos Pico)