NIADTONG nagsugod pa ko og sikad, nagsige ko og ilis og mga ligid aron akong masuwayan ang traction sa lainlaing klase. Unsay maayong gamiton sa karsada ug unsay maayo sa kabukiran. Akong nasuta nga dako ang kalainan sa slick ug knobbies nga mga ligid.
Sa karsada, nindot tindakan ang slick kun ligid nga way grooves tungod kay hanoy. Naay deperensya sa kakusog sa dagan ug effort sa pagtindak. Ang nakaapan sa slick mao ang kakuyaw sa dangog nga bahin sa karsada. Dako ang possibility nga kini mo-skid kun ma-slide, labina kon mag hard braking ka.
Nakahinumdom sab ko dihang niapil ko og time trial sa pagtungas, diin sa 3 kilometros nga saka, nitala ko og 25 minutes. Sa tinud-anay, ang nakalangay nako mao ang akong pagkalamba ug kanunay nga pagka slide sa akong biseklita tungod sa slick nga mga ligid. Maayo kaayo nakong pagkalamba atubangan sa babayeng nagsunod nako sa pagsaka subay sa lapokon nga agianan kay sa wa pa magsugod ang time trial, nagbunok ang uwan.
Pagkaugma, nag-ilis ko og mga ligid nga knobbies samtang akong gihatag ang folding slick nako. Sukad niadto, knobbies na nga mga ligid, kun kanang dunay grooves ang akong gigamit, karsada man o sa kabukiran.
Bisan gani sa semi-slick nga mga ligid, di ko moduso tungod kay sa mga dan nga dunay gagmay nga mga bato, kuyaw gihapon ni. Mao ni ang nasinati sa akong manghod nga ni-dive sa karsada samtang nagdulhog kay dunay daghang pebbles human sa pagbunok sa uwan.
Kaluwasan
Dinhi imong makita ang ka importante sa ligid kon kaluwasan ang imong hisgutan. Wa ko mag-ingon nga di maayo ang slick nga ligid. Alang nako, sa kahimtang sa karsada nato karon bisan dinhi sa siyudad, di angay kompyansahan. Kon mag-slick ka og mga ligid, angay kang magbantay, labina sa ting-uwan kay dangog.
Alang nako, mas maayo ang semi slick sa karsada kay sa slick ra kay mas maayo og traction, di dali nga ma slide. Okay ra ang slick sa gagmay nga mga biseklita sama sa BMX kay mas dali kang makatukod, apan sa mga mountain bike nga labing minos 26 ang gidak-on sa ligid, mas kuyaw kay di dali ang pagpanukod tungod kay taas ang imong gilingkuran.
Brake
Tungod sa daghan nakong nasakyang mga biseklita, nasuwayan nako ang lainlaing klase sa brake. Sa mountain bike, akong nasuwayan ang V-brake, mechanical disc brake ug hydraulic disc brake. Sa tulo, ang hydraulic brake mao ang akong nauyonan. Busa, sukad niadtong 2012, mao na ni ang among gipangtaud sa among biseklita.
Ang nakanindot sa hydraulic braking system, inanay ang paghunong sa biseklita, di diha-diha. Mas kuyaw ang kalit nga pwersa sa brake, labina kon magdulhog, kay kalagmitan, itrapo ka ini sa yuta. Human sa makuyaw nakong kasinatian sa Transcentral Highway gamit ang mechanical disc brake, nibalhin ko sa hydraulic brakes.
Busa, kon mopalit ka og biseklita, mas maayo ang hydraulic braking system kay sa mechanical. Pangutana sa shop kon di ka pa suhito. Mas maayo nang maneguro.