MINNEAPOLIS - MAGBAGAT pagbalik ang dalan nila ni 4-time MVP LeBron “King” James ug one time- MVP ug kasamtangang Turner Network Television (TNT) analyst Charles “Chuck” Barkley atol unya sa National Basketball Association (NBA) 2017 All Star Game nga ipahigayon sa Smoothie King Center sa New Orleans, Louisana karong Lunes sa buntag oras sa Pilipinas.

Si James ug Barkley nagbinayloay og mahait nga mga pulong sa niaging semana human gisaway sa naulahi si James nga “whiny” kon reklamador ug bagutbotan apan gibawsan ni James si Barkley nga “hater” kon madinumtanon.

Niabot sa punto nga gisubay ni James ang mga personal nga kinabuhi ni Barkley hangtod nga midako ang ilang away.

Apan si Barkley nipa­sabot nga ang iyang komentaryo dili personal sa kinabuhi ni James. Matod ni Barkley nga ang iyang gisaway sa team captain sa Cleveland Cavaliers mao ang pagkareklamador tungod kay gusto niini nga pang-ilisan ang ubang pla­yers sa defending champions human kini nakatilaw og sunodsunod nga kapildihan sa nilabay’ng semana. Daniel Quindao Guden, US correspondent