Pagtangtang ni Emit sa chairmanship sa komiti sa konseho sa Talisay gitun-an
GITUN-AN na sa committee on laws and ethics sa konseho sa dakbayan sa Talisay ang hangyo sa mga sakop sa Federation of Talisay City Urban Dwellers Association nga paglangkat si Konsehal Doroteo Emit og komitiba diha sa konseho.
Si Konsehal Gail Restauro, chairman sa committee on laws, niingon nga karon lang adlawa nadawat sila ang kopya sa reklamo sa Fetcuda.
Mao kini hinungdan nga mohimo una siya og pagtuon ug makuha ang habig usab ni Emit.
Apan usa sa iyang plano mao nga sutaon kon ang mga nipirma nga sakop sa Fetcuda nga nanawagan paglangkat ni Emit sa iyang komitiba isip chairman sa urban poor nahibawo ba sila sa ilang gipirmahan.
Kini subay usab sa pamahayag ni Emit nga misinform ang mga sakop sa Fetcuda ug nasudlan kining pamolitika.
Matod ni Restuaro, posibling sa dili pa mahuman ning buwana makaduso na siya sa iyang committee report ngadto sa konseho.
Si Emit, sa iyang bahin, subling miklaro nga dili siya mobuhi sa katungdanan tungod kay ang tanan niyang lakang karon diha sa pederasyon sa Fetcuda adunay pagtugot sa kauban niyang konsehal pinangulohan ni Bise Mayor Alan Bucao.
Matod ni Emit, ang konseho nasayod sa plano nga tarungon ang Fetcuda ug ang pahimo sa pakisusi, walay bisan usa ka konsehal ang midawat nga maoy mohimo’g imbestigasyon bisan si Konsehal Soc Fernandez ug Bise Mayor Bucao human nasayod na sa sangpotanan niini.
Dugang ni Emit, siya na lang ang nidawat sa maong tahas busa iyang gibarugan nga dili siya talikdan sa konseho.
Si Emit mihangop usab sa pamahayag ni Mayor Eduardo Gullas nga dili manghilabot sa isyu.