GIPAAMBIT ni Cordova Mayor Mary Therese Sitoy-Cho nga duha ang tumong sa pagkahimo sa 10000 Roses Cafe sa lungsod.

Una, halad sa adlawng natawhan sa iyang amahan nga si Kalihim Adelino Sitoy ug ikaduha, isip landmark sa lungsod.

Si Kalihim Sitoy, Presidential Adviser on Legislative Affairs ug pangulo sa Presidential Legislative Liaison Office (PLLO), nisaulog sa iyang adlawng natawhan niadtong Pebrero 6, unang adlaw diin gipasiga ang mga rosas nga ginama sa LED lights nga gikan sa nasud sa South Korea.

“Gihalad ni namo niya (Sec. Sitoy) ang flowers nga di malaya and mahimong landmark sa Cordova human duol sa (umaabot) Cordova-Cebu bridge aron nga makita sad sa mga tawo nga moagi diri,” matod ni Cho sa eksklusibong pakighinabi sa Superba­lita Cebu.

Dugang sa mayor, dugay na unta ang proyekto sa pagpalambo sa dapit ug wa nalakip sa plano ang mga LED nga rosas niadto.

“Wala gyud na sa plano ang roses. Akoy sige’g follow-up sa investors kung unsaon ni nila diri and we really need income sa munisipyo,” dason ni Cho.

Saysay ni Sitoy, ang mga investor nakaideya nga cafe ang himuon sa dapit.

Siya usab ang nihangyo sa mga investor niini nga pabutangan ug LED roses ang maong dapit isip surprisa sa adlawng natawhan ang iyang amahan.

Sigun sa mayor nga si Miguel Cho, manager ug anak sa iyang bana ang nakaideya sa mga rosas ug ilang kining giadto sa Dongdaemun Design Plaza sa South Korea.

Nasuta ning mantalaan nga usa ka eco-tourism livelihood project ang dapit sa mga lokal nga mangingisda sa Day-as.

Human giablihan sa publiko ang maong cafe, padayon kining gidagsa sa mga linibong mga nakuryuso nga mga bisita,gani, nakakuha kini sa atensyon di lang sa mga lokal apan lakip na sa national media.

Apan dakong hagit sa kagamhanan sa Cordova ang kahuot sa trapiko paingon sa Day-as, seguridad ug basura nga gipanglabay sa mga nibisita sa dagat duol sa cafe.

Kini maoy hinungdan nga nipatuman ang kagamhanan sa lungsod nga mangulekta og P20 nga environmental fee sa mga buot mobisita sa dapit.

Gidepensaan sab sa mayor ang ilang pagpangulekta sa P20 nga fee nga kini nalakip na sa joint-venture aggreement tali sa kagamhanan ug Cordova-Cebu Golf and Resort Corp. nga giaprobahan sa konseho sa lungsod niadtong 2014.