NALIMBUWAD ang usa ka sakyanan duol sa baba sa tunnel sa South Road Properties (SRP) human makabangga sa usa ka sports utility vehicle (SUV) pasado alas 10 sa milabay nga gabii.
Ang ngalan sa drayber ug bugtong naangol sa aksidente wa pa makuha sa kapulisan sa Traffic Division human madala sa pribado nga tambalanan.
Siya maoy nagmaniho sa Toyota Corola (GHP-838) nga maoy nalimbuwad.
Iyang nabanggaan ang SUV (ABM 8157) nga gimaniho ni Vic Lodovice, taga Fairview Village, Lawa-an 2, siyudad sa Talisay.
Sa pasiuna nga imbestigasyon ni SPO1 Filomeno Lim sa Traffic Division nagbutyag nga nagdagan nga sama ang direksyon sa duha ka mga sakyanan nga pulos paingon sa norte.
Si Lodovice nga unang nahinabi ni Lim niingon nga ni-overtake ang Toyota Corola sa iyang wala nga habig.
Nasaghiran ang kilid sa iyang sakyanan ug human niini, kalit nga nawagtangan sa kontrol ang drayber sa Toyota Corola.
Nibangga kini sa tumoy sa gutter dool sa baba sa tunnel nga maoy nag-iway sa duha ka dalan nga paingon ug Plaza Independencia ug paingon sa ilawom sa tunnel.
“Pagkabangga niya sa gutter, misalta ang sakyanan hangtud nga nalimbuwad paingon sa ilawom sa tunnel,” sulti ni Lim sa Superbalita Cebu.
Daling nakaresponde ang ambulansya sa Siyudad sa Sugbo ug daling gidala sa pribado nga tambalanan ang drayber sa awto.
Matod ni Lim nga ilang paabuton nga maabot sa ilang buhatan ang drayber sa Toyota Corola aron makuha ang iyang habig kabahin sa hitabo.