KON ang iyang mga kaalyado sa Liberal Party supak sa pagbanhaw sa death penalty, si Cebu City Mayor Tomas Osmeña pabor sa pagbalik sa silot kamatayon sa mga nakombikto sa heinous crime.

Ang mga kongresista ug senador nabahin sa ilang baruganan kon angay bang buhion ang death penalty.

Sa 24 ka mga senador, siyam ang supak sa pagbanhaw sa death penalty ug unom kanila sakop sa LP ni kanhi presidente Benigno Aquino III.

Wa pa usab sila magkasinabot kon angay ba iapil o dili ang plunder case, nga maoy sagad atuba­ngon sa mga opisyal nga gipasa­nginlan nga na­ngurakot lapas sa P50 milyones, sa mga niluog nga krimen.

“I think it should be included. When you steal billions from the government, it cost lives. You prevent people from surviving. You should be executed,” pag­hulagway ni Osmeña kabahin sa plunder case.

Ang death penalty giaprobahan niadtong Disyembre 13, 1993 ubos sa Republic Act No. 7659 nga nagsilot sa linu­og nga krimen sama sa pagpatay ug uban pa.

“You murder one person, you should be executed but when your action makes a lot of people die and increa­ses the mortality rate because the government cannot give adequate protection, you don’t deserve to live,” matod ni Osmeña kinsa niingon nga angay usab nga iapil ang mga tax evader.

Si Senador Francis “Kiko” Pangilinan sa LP, kinsa usa sa siyam ka senador nga supak sa death penalty, nibisita dinhi sa Sugbo sa miaging adlaw.

Siya nibutyag nga inay banhawon ang silot nga kamatayon, angay hingusgan ang judicial justice system sa nasod.

Ang mayor nipadayag nga alang kaniya, ang nasod sa Singapore maoy maayong modelo sa death penalty sanglit iyang gihulagway nga ang mga konbiktado sa ginadiling druga (lapas sa minimum) silotan diha-diha dayon.

Iyang gihimong sang­litanan ang usa ka babaye nga foreign national kinsa nag-stop-over sa Singapore ug nakuhaan og illegal drugs lapas sa minimum ug na­silotan og kamatayon.