SI Judge Raul Barbarona sa 14th Municipal Circuit Trial Court Dauis-Panglao nakigsulti sa mga abogado, lakip kang Mia Manuelita Mascariñas-Green, human sa hearing sa ilang mga kaso niadtong Lunes.

Nag-estorya sila kabahin sa di maayong dala sa kahimtang sa edad. Sagad kanila lapas na sa 40 anyos.

Ilang nahisgutan ang pagpamuti na sa ilang buhok mao nga si Green nagpatina.

“Naputi na iyang buhok maong nagpa-blonde daw siya,” matod ni Barbarona.

Paglabay sa duha ka mga adlaw, duha ka mga killer nga nagsakay og motorsiklo ningpusil patay kang Green, usa ka environmental activist samtang siya nagmaneho sa sakyanan.

Iyang tulo ka mga anak nga pasahero niya wa maunsa sa hitabo niadtong Miyerkules sa hapon sa Tagbilaran City, Bohol.

Usa ka misa ang gihalad alang sa abogada sa may mga eskina sa dan H. Zamora ug J.A. Clarin, ang dapit nga nahitaboan.

Matod ni Barbarona nga siya gisultihan nga usa ka international environmental group nga nagbase sa Oregon, Estados Unidos, mopadala og suwat sa United Nations Human Rights Commission ug kang Presidente Rodrigo Duterte.

Ang huwes ug si Green mga sakop sa Environmental Legal Assistance Center (Elac).

Iyang giawhag ang mga awtoridad sa dinaliang pagsikop sa mga suspek aron mataral sila sa hukmanan.

Ang kapulisan niila sa giingong mga killer nga sila si Lloyd Lancer Gonzaga, manager sa usa ka resort sa Panglao ug si Romarico Benigan.

Matod ni Tagbilaran City Police Chief Nicomedes Olaivar Jr., si Green naapil sa away tali sa iyang kliyente ug sa tag-iya sa resort.

Ang away sa kliyente ni Green ug sa tag-iya sa resort niabot sa korte.