USA ka negusyante ug usa ka seaman ang dungan nga nasikop sa kapulisan atol sa gilusad nga drug bust sa Sta. Ana Police Station sa ala 1:40 kagahapon sa kaadlawon, Biyernes, didto sa Dacudao Avenue, Barangay Paciano Bangoy, Agdao District.
Si Police Superintendent Royina M. Garma, hepe sa Sta. Ana Police Station, nag-ila sa mga dinakpan nga sila Jeffrey Dancel Sison, 45, minyo, negusyante, nagpuyo sa Sapphire Street, Sison Subdivision, Buhangin, ug si Obet Morata Malonzo, 30, seaman, residente sa Laverna Hills Subdivision, Buhangin.
Sumala ni Garma nga dugay na nilang gihupu-hupoan ang ilegal nga lihok sa suspek nga si Sison una nila gilusad ang operasyon apan naaktuhan nga duna sab kini kauban.
"Matagal na nating sinusundan ang subject person natin at kanina lang (Biyernes) ay naaresto na natin sila, kasama na niya itong isa. Ang worth ng mga druga na nakuha natin ay umabot sa P250,000," asoy ni Garma sa SuperBalita kagahapon.
Nakuha sa ilang posisyon ang upat ka pakite lakip ang usa ka dakong sako sa gituohang shabu lakip ang usa ka pakite sa pinaugang dahon sa marijuana, susi sa motorsiklo, usa ka sling bag ug P1,000 nga drug bust money.
Ang mga suspek temporaryong gibalhog sa selda sa presinto uno samtang giandam na ang kasong paglapas sa Republic Act 9165, kun Comprehensive Dangerous Drugs Act of 2002. (Jeepy P. Compio)