ANG Mindanao Migrants Center for Empowering Action Inc. (Migrante) nangita'g hustisya sa kamatayon sa domestic helper, kinsa giingong naghikog pinaagi sa pag-ambak gikan sa ikalimang andana sa gi-istaran niini nga building sa Hawally, Kuwait, Mayo 22, 2015.

Ang nasampit nga Filipina household service worker (HSW) mao si Helen Riobuya Sarocam, 41, nagpuyo sa Monkayo, Compostela Valley Province.

Si Irish Maquilan, spokesperson sa Migrante, nagsulti nga usa ka "mysterious case" ang kamatayon ni Sarocam.

"Para sa amo kay mysterious case gyud siya, wala ta kabalo basi gituklod ba siya didto, kung ako usa ko ka-OFW (overseas Filipino worker) nganong mo-ambak ko nga gusto na nako mouli sa akong pamilya kay gimingaw ko or dili na nako kaya ang trabaho," sulti ni Maquilan nga nahinabi sa Sun.Star Davao Huwebes sa gabii.

Samtang si Overseas Workers Welfare Administration (Owwa)-Davao officer Rey Elaya nag-ingon nga ang ilang Philippine Overseas Labor Office (Polo) sa nasud Kuwait kasamtangang naghimo og makuting imbestigasyon sa maong hitabo.

"Ang atong welfare officer sa Kuwait naga-paningkamot pod para mapagawas niya ang kopya sa imbestigasyon," sulti ni Elaya.

Tubag sa Owwa ngadto sa Migrante nga kung magkinahanglan og tabang ang mga pamilya sa biktima, gilayon nila kining tabangan nga maduso sa opisina sa Kuwait.

Sumala sa Owwa nga ang pamilya sa biktima makadawat og P20,000 nga burial assistance, dugang pa nga mahatag sab ang P120,000 kung mapamatud-an nga natural ang pagkamatay sa biktima, samtang P200,000 kung aksidente kining namatay.

Sa nakalabay nga Huwebes, ang patay nga lawas sa biktima miabot sa dakbayan lulan sa foreign airlines gikan nasud Kuwait.

Kahinumdoman, subay sa testimonya sa iyang mga kasikbit nga roommate sa Hawally, nanglimpyo ang biktima sa bintana, apan lahi na ang ilang namatikdan gumikan mosulay na kini'g lukso.

Kalit gidagan sa ilang mga kauban ug nagunitan, apan giingong mipugos kini'g lugnot maong wa na nila napugngi gikan sa ikalimang andana sa Hawally padung sa nag-parking nga kotse sa ubos.

Sumala sab sa agency ni Sarocam nga miabot siya sa nasud Kuwait Disyembre 19, 2014 diin gibalik siya sa iyang agalon gumikan duna silay problema sa biktima ug ang iyang lady employer.

Sa miaging Mayo 20, gibalik sab si Sarocam sa iyang ikaduhang agalon gumikan gusto niini nga mouli sa Monkayo. (Jeepy Compio/Kriztja Labrador)