ILIGAN CITY -- "Daku ang natabang sa Oplan Tokhang sa pagsumpo sa ginadiling droga sa dakbayan."
Kini ang pamahayag ni Chief Inspector Jovanne Cabusas, hepe sa Police Community Relations Unit (PCRU) sa Iligan City Police Office (ICPO), usa ka bulan human gimando ni Philippine National Police Chief Director General Ronald Dela Rosa, ngadto sa kapulisan, ang temporaryo'ng pag-undang sa ilang mga anti-illegal drug operations ug isangon nalang kini ngadto sa Philippine Drugs Enforcement Agency (PDEA).
"Atong nakit-an nga mitabang ang mga opisyal sa barangay sa Oplan Tokhang tungod kay nakit-an man usab nila nga seryoso ang kapulisan sa Iligan. Pananglitan sa Barangay Saray, namingaw gyud, dili pareha sa unang panahon nga gawas ug sulod ang mga tawo nga dili mailhan, murag dunay kung unsa nga factory diha," matud ni Cabusas.
Hangtud niadtong Enero 30, miabot sa 153,180 ka mga balay sa Iligan ang nabisitahan sa kapulisan ug 4,817 ang mga boluntaryo'ng midoul kanila aron isumiter ang ilang kaugalingon (surrenderers) alayon sa ilang Tokhang operation.
Niini nga gidaghanon, 4,473 ang mga "users" ug 344 ang mga "pushers." Kini nga gidaghanon gilangkuban sa 4,560 ka mga "adult" o anaa na sa hamtong nga pangidaron, 238 ang mga menor-de-edad, ug 19 ang mga senior citizen.
Sa mga anti-illegal drug operations sa ICPO, aduna silay napahigayon nga 218 ka mga anti-drug operations ug service of search warrant.
Miabot sa 15.125 grams ang ilang nasakmit nga marijuana ug 2,684 grams ang shabu nga adunay kantidad sa P13,426,615 base sa kantidad sa Dangerous Drugs Board.
Sa 420 ka mga na-aresto, 523 ang mga kaso nga na-file ngadto sa korte.
Lima ang namatay sa Iligan sa mga legitimate nga anti-illegal drugs operation sa ICPO.