DUL-AN usa ka milyon nga kantidad sa mga alahas ang na-recover gikan sa usa ka lalaki sa Macasandig, dakbayan sa Cagayan de Oro.

Nasikop si Dennis Galuno, 25, adunay kaipon ug residente sa Isla De Oro, Barangay Consolacion ning dakbayan ug usa ka laborer.

Gikabutyag ni Police Senior Inspector Julius Saluta, hepe sa Police Station 9 (PS9) sa Macasandig, nga nahitabo ang pagpangawat niadtong milabay nga adlaw hinungdan nga nagpahigayon ang otoridad og hot pursuit operation ug malampusong nasikop ang suspek human usab kini nakita ang hulagway diha sa closed-circuit Television (CCTV) camera sa mga palibot nga establistamento sa maong panimalay.

Nagpasalamat kini gumikan kay dako og gikatabang ang mga CCTV sa maong dapit alang sa dinaliang pagsulbad sa hitabo tungod kay naila ang suspek base na usab sa kuha sa CCTV camera.

“Pasalamat gyud kita no nga duna’y mga CCTV diha sa palibot mao kana nga pagka buntag sayo gyud atong gihangyo ang mga palibot nga mga establistamento nga atong matan-aw ang ilang mga CCTV ug pinaagi niadto, nakita gyud nato sa maong CCTV ang panghitabo. Nakita didto ang suspetsado, naklaro ang nawong. Mao kana nga nagpakitabang kita sa atong mga impormante later on gyud duna gyud nakatudlo nga katong maong suspetsado naa gyud nagpuyo diha sa suba sa may Consolacion,” pahayag ni Saluta.

Giingong nabawi ang ubay-ubay sa mga alahas niini gikan sa suspek apan ang uban matud pa niini ang naprenda na.

Sa bahin sa suspek, giingong una niini nga higayon nga nahimo ang pagpangawat.

Sa pagsulat niini nga balita, ang suspek ang nagtingkagol na sa mini-cell.