2 nagpataya gikiha

DAVAO DEL SUR -- Gipasakaan na og mga kaso sa managlahing istasyon sa kapulisan ang duha ka mga tawo nga nadakpan nga nagpataya og ilegal nga sugal sa sagunsong operasyon.

Giduso sa Kiblawan Municipal Police Station ang kasong paglapas sa Anti-illegal Gambling Law sa nasud batok sa suspek nga si Rosemarie Ruelan Davis, 45, minyo human nasikop sa Purok 8, Barangay Poblacion, lungsod sa Sulop.

Ang kasong paglapas sa Republica Act 9287 kun Illegal Gambling gisang-at sa buhatan ni Associate Provincial Prosecutor Daisy Mabuti-Rebosa niadtong Biyernes, Pebrero 17, human naaktuhan nga nangolekta gikan sa ilegal nga sugal nga Last Two.

Susamang kaso sab ang gipasaka sa Digos City Police Office batok kang Antonio Montecalvo, 45, ulitawo nga molupyo sa dalang Lopez Jaena, human naaktuhang nagpataya sab og Last Two sa dalang Clarion, Barangay Zone 3 ning dakbayan.

Subay sa mando ni Senior Superintendent Samuel Gadingan, Davao del Sur Police Provincial director, hingpit nga gukdon ang tanang nagpaluyo sa duwang Last Two aron maundang na ang ilegal gambling sa probinsiya. (Orlando B. Dinoy)