MAGUINDANAO PROVINCE -- Usa ka notoryus nga lider sa grupo sa mangilkilay ang nadakpan, alas 5:45 sa hapon niadtong Biyernes, Pebrero 17.

Giila ang suspek nga si Jerry Ibrahim, 43, minyo, dispatcher sa public terminal sa Datu Saudi Ampatuan.

Matud ni Maguindanao Provincial Police Office director, Senior Superintendent Agustin Tello nga milusad og entrapment operation ang hiniusang puwersa sa Isulan Municipal Police Sation, Datu Saudi Ampatuan MPS, 601st Brigade, 1st and 2nd Mechanize Batallion ug uban pa sa Barangay Poblacion sa maong lugar.

Akto nga dawaton na unta sa suspek ang tunga sa milyon ka pesos gikan sa asset sa mga awtoridad hinungdan nga giposasan dayon siya.

Ang grupo ni Ibrahim nangayo og usa ka milyon ka pesos matag bulan sa Husky Bus Company nga dunay ruta nga General Santos City paingon sa dakbayan sa Cotabato.

Una nang nagbahad ang grupo ni Ibrahim nga ilang sunugon o bombahan ang mga unit sa Husky Bus kung mapakyas kini sa paghatag og protection money.

Ang pundok ni Ibrahim gitumbok nga mga sakop sa Alkhobar Terror Group nga naglihok sa North Cotabato ug Maguindanao.

Ang suspek gidala dayon sa Police Regional Office-Soccsksargen ug gitakda nga pasakaan og tukmang kaso. (Edgar E. Fuerzas)