DAKPON sa kapulisan sa Davao City Police Office (DCPO) ang mga magsugal sa lamay sa patay.
Kini ang gibutyag ni DCPO spokesperson Senior Inspector Catherine dela Rey human ilang gipakusgan ang pagpanakop sa mga tawo nga nalambigit sa illegal gambling.
Sumala ni dela Rey nga kung ang tumong magpasugal aron naay magasto ang mga tagtungod sa namatay, di suma pa kini rason nga magsugalay, inay idiretso na lang og limos ang ipusta sa sugal.
"Puwede mag-baraha diha aron di lang makatulog, pero walay na-involved nga kuwarta nga gipusta, puwede man nga idiretso na lang diay og limos," sulti ni dela Rey.
Nanganti si dela Rey nga ilaha gayud nga dakpon ug prisuhon ang mga masakpan nga nagsugal atol sa lamay sa patay.
"Dakpon gyud nato sila, pasakaan gyud nato sila og kaso, so mas maayong mosunod na lang ta sa atong gipatuman karon nga balaod," pagpasabot ni dela Rey ngadto sa publiko.
Pag Sabado, gisumite sa DCPO ang ilang accomplishment report ngadto sa Police Regional Office (PRO)-Davao Region labot sa kampanya sa ilegal nga sugal, ug nakaabot na sila sa gitagana nila nga quota gikan sa higher office.
"Hinuon na cope up man nato ang quota, ug padayon kitang manakop, wala tay gipili bisan sa namatyan kung kini dunay na-involved na nga pusta," ingon ni dela Rey.
Bag-ohay pa lang natukod sa DCPO ang Anti-Illegal Gambling Task Force ug tungod niini, mas giistrikto ug giseguro karon sa DCPO ubos sa superbisyon ni director Senior Superintendent Michael John Dubria nga motaas pa ang ihap sa mga nadakpan sa ilegal nga sugal.