MALITBOG, Southern Leyte - Naugdaw ang 26 ka mga panimalay sa Barangay Pasil, lungsod sa Malitbog, Southern Leyte human niigo ang usa ka dakong sunog niadtong Martes sa hapon.

Pulos ginama sa ‘light materials’ ang mga kabalayan nga gikaon sa kayo.

Nasayran nga nagsugod ang kayo sa panimalay sa usa ka Jack Maceda diin matod sa nakakita nga dunay tulo ka gipasagdang bata ang nagduwa og pusporo nga maoy naingnan sa kayo nga nikatap sa kabalayan.

Alas 5:30 sa dihang niresponde ang kabomberohan sa Maasin City, Macrohon, Bontoc, Sogod ug Malitbog sa samang lalawigan.

Way nasalbar nga gamit ang mga lumolupyo ug anaa sa 23 ka pamilya nga gilangkuban sa 113 ka indibidwal ang naa karon sa Malitbog gymnasium.

Alas 6:40 gideklarang fire out sa kabomberohan ang sunog.

Mokabat sa P4.5 milyones ang gibling danyos sa insidente.

Wa hinuoy gikatahong nakalas ug naangol sa sunog.