GIPANGTUGNAW ang tanan tungod sa talagsaon nga kabugnaw sa panahon tungod sa hanging amihan. Daghan sab ang natanggong sa mga pantalan tungod sa gale warning nga giluwatan sa Pa­g-a­sa. Ang kusog nga hangin niresulta sa pagdagko sa balod. Di lang ang mga dagkong sakyanan sa dagat ang apektado. Hasta ang mga sakayan sa atong igsoung mananagat.

Gumikan niini, napawong ang ilang panginabuhi kay di naman sila makapalawod. Dunay nisulay apan wa makalahutay nipauli nga gamay ra ug kuha tungod sa kadagko sa balod.

TALISAY

Ang una nakong giduaw nga mga mananagat mao ang taga Pooc sa siyudad sa Talisay. Didto akong nahimamat si Luiz Hernane Jr. Akong giatngan ang iyang pag-abot gikan nga nanagat. Naglabi sa iyang kuha isda nga lapis ug upat ka kubal kubal.

Iyang asoy diri nako nga wa siya makapalawod ug maayo yungod sa kadagko sa balod. Kini hinungdan nga minos ug klase ang iyang kuha unya gamay ra sab kaayo.

Iyang kwenta modul-an na sa usa ka bulan kining maong kahimtang sa panahon nga naka apekto ug dako sa panginabuhian. Sa sitwasyon ni Luis nga dunay lima ka anak mag-unsa naman lang sila nga panagat ra man gyud ang ilang gisaligan.

Maayo’g si Luis ra. Naa pay daghang parehas ug sitwasyon ni Luis diha sa Talisay City. Matod ni Luis panahon na nga motabang ang gobyerno pinaagi sa pagtunol ug libring pagkaon samtang nga  naa pa ang problema.

Akong gisaka ang opisina ni Mayor Eddie Gullas ug giduso ang problema ni Luis. Wa si Mayor Gullas niadtong higayona apan gipasaligan ko sa iyang tigpamaba nga ilang pahibaw-on ang mayor.

MINGLANILLA

Sunod nako gibisitaan mao ang Barangay Tulay sa lungsod sa Minglanilla. Sama sa Talisay City nagproblema sa ang mga mananagat sa maong dapit. Nagpahuway ang ilang mga pumpboat ug sakayan sa baybayon. Way gamit tungod sa ka dagko sa balod. Nanawagan ang mga mananagat didto ug ayuda gikan sa munisipyo.

Si Bayani Sellon kumprador ug isda nga taga Tulay ra sab nitug-an nga gikan siya nga nangumpra ug isda sa kadagatan sa Bohol. Puwerting ni­hita mao nga di kaayo daghan ang iyang nakumpra. Nakit-an nako ni nga gikarga ug tangkal tangkal.

Niingon si Bayani nga sa maong gidaghanan 20 ka mananagat ang gipalitan. Parehas ra ang katarungan sa mga mananagat sa Bohol. Di sila makasugakod sa kadagko sa balod mao gamay ra ang ilang kuha.

Sa ato pa, di lang mga mananagat sa Sugbo apil na ang taga Bohol ang apektado. Sayod na niini ang taga Department of Agriculture. Imposibli man sab ug wa sila mag-monitor. Unsay gihimo karon sa maong ahensiya ngadto sa mga mananagat? Duna bay mapaabot nga suporta ang maong ahensiya sa apektadong mananagat?