KANUG-A pa man kaha makab-ot ang kalinaw sa atong nasud uban sa Communist Party of the Philippines (CPP)? Unsa man gyud ang ilang tumong ug tuyo? Nagpabilin pa ba ang ilang laraw ug tinguha sa pagtukod og usa ka “people’s republic” dinhi sa Pilipinas?
Daghan nang mga administrasyon nga naningkamot nga makakab-ot og kalinaw uban sa CPP ug sa armadong kamot niini, ang New People’s Army (NPA). Dunay mga ceasefire nga gideklarar, apan sa kalit lang makabalita kita nga gibanhigan sa NPA ang mga sundalo sa gobyerno.
Kon nagpabilin ang ilang tumong ug tinguha nga magtukod og usa ka people’s republic, way kalinaw nga mahitabo hangtod nga ang CPP ug NPA mapukan sa hingpit.
Si Presidente Rody Duterte mideklarar ug usa ka unilateral ceasefire batok sa NPA. Ang CPP-NPA mideklarar sab sa ilang kauglaingong unilateral ceasefire. Pero sa wa madugay, gibakwi kini sa CPP-NPA kay gilapas sa gobyerno ang ceasefire. Si Duterte milibkas sab sa unilateral ceasefire.
Unsa man ang gilapas sa gobyerno? Wa silay pormal nga ceasefire, pulos unilateral o ilang kabubut-on. Sa ato pa wa silay gikasabotan. Tungod kay way gikasabutan, way giuyonan, way lagda nga nalapas. Ang tumong lang mga moundang sa nilag pinusilay sa usag-usa.
Klaro nga di gyud gusto og kalinaw ang CPP-NPA. Sa mga bugoy pa sa eskina, nangita lang og ligas, paka dayon.
Ang gobyerno mideklarar na og usa ka “all-out war” batok sa NPA. Apan ang CPP niingon nga bukas gihapon sila sa paghimo ug pagpiram sa usa ka bilateral ceasefire agreement.
Matod pa sa CPP sa ilang pamahayag, ang gikatakda nga pagtuki sa bilateral ceasefire agreement didto sa The Netherlands karong Pbrero 22 hangtod sa 27 mahimong magpadayon kon mohukom si Duterte sa pagpadala sa negotiating panel sa gobyerno. Apan wa nila mabasa ang hunahuna sa Presidente.
Si Duterte nangandoy nga makab-ot ang kalinaw sa iyang administrasyon. Pero di kini di malisang nga makiggubat batok ni bisan kinsa.