GIPAKITA sa San Miguel Beer ang kalidad sa usa ka kampyon bisan pa man og anaa kini sa makuyawng sitwasyon pinaagi sa pagdominar sa kuwang og puwersa nga TNT Katropa, 104-88, niadtong Sabado sa Game 6 sa PBA Philippine Cup semifinals series sa Mall of Asia Arena.
Managlahing sitwasyon ang nahitabo sulod sa kinatibuk-ang duwa apan ang Beermen maoy mipatugbabaw sa second half human sa bati ug bugnaw kaayong pagsugod sa panag-engkuwentro nga maoy nagtabla karon sa series, 3-3, ug naghatod ngadto sa do-or-die battle diin ang mananaog maoy makalangkat sa unang lingkuranan sa championship series.
Ang Sugboanong si June Mar Fajardo miposte sa iyang ika-11 nga 20-20 performance human kini mikulit og 23 puntos ug 21 ka rebounds gawas sa upat ka blocks nga iyang nahimo. Midugang si Arwind Santos og 21 puntos ug usa na lang ang kuwang sa rebound aron usab siya maka double-double sa maong kagabhion.
“Lahat sila gusto manalo,” nagkanayon si SMB coach Leo Austria. “In spite of a below-par performance in the first half, but in the second half, nakita yung ine-expect ng marami sa amin eh. Hopefully mangyari ulit yun sa next game.”
Ang Game 7 ipahigayon karong gabii sa mao gihapon nga dapit – ang MOA Arena.
Nabiyaan na unta og 12 puntos ang Beermen apan ila kining gipapas sa third quarter ug napugnit ang usa ka puntos nga labaw sa pagsulod na sa fourth quarter ug ilang gilupig ang Texters, 34-19, nga maoy nagwanang sa ilang dalan paingon sa kadaugan.
Si RR Garcia ang miduslit sa rally sa third nga gisumpayan usab ni Alex Cabagnot sa uwahing bahin.
Dobling dimalas ang naangkon sa Ka Tropa kay di lang ang pagpalta ni Troy Rosario human kini nagpakasal sa iyang hinigugma sa maong adlaw, wa usab makatiwas si Jayson Catro sa duwa tungod sa slight injury nga naangkon sa iyang tikod sa third.
Mga puntos:
SMB 104 – Fajardo 23, Santos 21, Cabgnot 19, Ross 14, Garcia 9, Lassiter 7, Espinas 5, McCarthy 2, De Ocampo 2, Agovida 1, Tubid 1, Heruela 0,
TNT 88 – Castro 19, Pogoy 12, Fonacier 12, Reyes 9, Williams 8, Rosales 7, Tautuaa 6, De Ocampo 5, Carey 3, Tamsi 3, Rosser 2, Seigle 2, Golla 0, Sumalinog 0.