USA ka makusog nga patid ang naghatod kang Roel ‘Akiyama’ Rosauro sa impresibong kadaugan batok kang Urtych “Tank” Alarin sa main event sa 2nd Cebu Extreme Fight League (CEFL): No Way Out mixed martial arts promotion niadtong Sabado sa gabii sa Cebu Coliseum.

Si Rosauro, kinsa garbo sa Yaw-Yan ArDigma Cebu, migamit sa iyang wa nga tiil alang sa antimanong pagpatid sa kilid nga bahin sa lawas ni Alarin nga naghatag kaniya og 3rd round TKO nga kadaugan sa featherweight nga away.

Sa kakusog nga patid nga iyang nadawat, si Alarin, kinsa sakop sa XFC MMA sa Butuan City, nalup-og sa ika-42 segundos sa round ug taodtaod pa una kini nakabarog pagbalik.

Pagkahuman sa away, nagpasalamat si Rosauro sa Kahitas-an ug sa nagpasiugda sa promosyon nga si Yaw-Yan ArDigma CEO/Founder ug Vis-Min director Master Benigno "Ekin" R. Caniga Jr. sa oportunidad nga iyang nadawat.

Si Arnel “Ronin X” Ylanan sa Deftac Vagabond Cebu nidaog batok kang Romel “The Axe” Lugo sa Yaw-Yan Olongapo City MMA pinaagi sa rear naked choke sa ika-1:24 pa lang sa 1st round.

Napa-tapout sab ni Lemuel “Musang” Maglinte sa Yaw-Yan Ardigma Cebu pinaagi sa rear naked choke si Rodel “Mighty Mouse” Calbog sa My Gym MMA sa Dumaguete City sa ika-2:11 minutos sa 1st round.

Midaog si Ivan Rodley “Masimus” Victorio sa Yaw-Yan Ardigma Olongapo batok kang Nino Rio “Pitbul” Saoy sa Mactan Combat Sports pinaagi sa unanimous decision.

Midaog sab si Joemar “Restaman” Bayang batok kang Jomar “Rush” Manlait pinaagi sa split decision. Ningdaog sab sila si Peter Paul “Sniper” Sonido sa ER Spawn MMA sa Antique batok Kim “Mighty Lim” Vallejos (UD), Rufino “Noypi” Mante batok Romel “RJ” Deita sa Roxas City (Tapout, 2nd rd.), Frederick “Peanut Butter” Lim Jr. sa Dumaguete City batok Dane Caesar Dawal (Tapout, 3rd rd).

Nagmalampuson sab sila si Rhyle “The Bully” Lugo sa Deftac Cebu batok Ariane “X-Cuter” Fantilanan (KO 1), Tonix “Silent Killer” Borres sa JB Dream Fitness gym sa Cebu City batok Erving “Immortal” Mosico s(UD), Luther “Bang-Bang” Trigo batok Mark “The Fit” Tapales sa Warrior MMA Cebu (TKO 1). Milampos usab si Charlo Bagaan sa Durex Dragon MMA sa Lapu-lapu City batok Romar “Jedi” Villudres sa Team Bagwis Mandaue (split decision).