GITATAW sa pangulo sa Traffic Enforcement Agency of Mandaue (TEAM) nga ang rason nganung nidaghan ang ilang nadakpan sa anti-jaywalking ordinace ug no-stopping tungod sa pagpasagad og hunong sa mga jeep ug pasagad og kanaog sa mga pasahero nga sagad masakpan sa ilang enforcer nga wa naka-uniporme.

Sumala ni Glenn Antigua nga laing hinungdan nga nidaghan ang ilang mga na­sikop mao nga sa tibuok Mandaue na ang ilang operasyon kalabot sa hugot nga pagpatuman sa balaod trapiko.

“Maong ni-anam siya ug kadako kay entire city na atong gibuhat nga operation sa anti-jaywalking. Kanang mga patakag kanaug nga mga pedestrian, isyuhan ang driver ana ug isyuhan pud ang pedestrian. Niya kana sang magpataka ug pasakay, same ra gihapon,” matod ni Antigua sa Superbalita Cebu.

Si Antigua nagkanayon nga nakadawat silag reklamo nga kuwang og signage asa mahimong makahunong ang mga PUJ ug makalabang ang mga pasahero apan siya nagkanayon nga may pedestrian crossing ang dakbayan sa mga traffic lights niini.

“Sa UN avenue, ang stretch niya is taas kaayo, ang among gibuhat is gipaalihan nakog alambre ang tunga sa center island aron di molabang ang mga tawo.Surprisingly karon, naa nanawag nga giputol ang among alambre maong among gi-trace sa CCTV kinsa ang nagputol kay amo gyud tong dakpon,” butyag ni Antigua.

Nasuta ning mantalaan nga ang mga nasikop sa TEAM sa jaywaking moabot na sa tag-500 matag adlaw samtang kapin sa 100 ang ilang masikop sa no-stopping.

Kalabot sa isyu nga nga gikotahan sa TEAM ang ilang mga enforcer, kusog kining gihimakak ni Antigua tungod kay matod niya nga ang ilang gibuhat sa TEAM mao ang pagpahuninumdum lang sa trabaho niini isip enforcer.

Pagbayad sa multa giklaro ni Antigua nga wa nila tuguti ang mga enforcer nga maoy bayaran sa multa kon adunay madakpan.

Apan kon mobuluntaryo nga mobayad ang dinakpan sa TEAM, gikonsidera kini sa iyang buhatan.

“If mo-volunteer ang nadakpan kay dili taga diri, nagdali ba ron. Pero ato silang pasuwaton sa luyo sa citation, ug ato silang papirmahan nga ni-volunteer siya kay di gyud ta mo-allow nga ang atong enforcer siya maoy mo-collect,” paambit niya.

Dugang niini nga ila kini nga gituyo aron inig adto sa ilang buhatan, pangitaan kini sa attachment nga nagpamatuod nga kini nagboluntaryo.

Ang multa sa jaywalking mokabat sa P50 sa kalapasan apan kon wa kay P50, mahimo kang mogunit ug mop o silhig aron manilhig sud sa upat ka oras, padayag ni Antigua.