TRUCK ban sa dakbayan sa Talisay kasamtangan karong gihunong sa City of Tali­say-Traffic Operation Development Authority (CT-TODA).

Kini maoy gibutyag sa pangulo sa CT-TODA nga si Almond Dela Peña sa tuyo nga di magamit sa mga karaang traffic enforcer sa Talisay nga padayong nag-operate bisan gamit ang ilang citation.

Matud ni Dela Peña nga ang truck ban maoy gamiton sa mga nataktak nga enforcer aron sila makakwarta.

Gumikan niini iyang kasamtangang gipahunong ang operation sa truck ban ordinance samtang naglimpyo pa siya sa iyang mga sakop.

Apan iyang giklaro nga musikop gihapon sila sa mga truck nga klaro ug tataw nga nakabara sa trapiko ilabi na nga mag-parking sa daplin sa karsada.

Iyang gipasabot nga adunay mga dagkong sakyanan nga mo-parking lang una kilid sa karsada og magpaabot sa oras nga wa nay truck ban, apan nakahatag kining kasamok og kahuot sa trapiko hinungdan nga mao kini ang ilang gihingusgan sa pagpanakop.

Kahinudmoman tulo ka mga kanhi enforcer ang ilang nasita human nanakop tungod sa truck ban ug nang isyu pa kinig citation ticket nga wa nila gipang-surrender.

Ang tulo gikatakda nang pasakaan kinig kaso ngadto sa piskaliya.

Gipaabot pa nila nga daghan pa unya nga mouli sa mga citation ticket ug ubang kagamitan sa mga gitaktak nang mga enforcer diha sa ilang buhatan.