NAHADLOK si City of Naga Mayor Kristine Vannessa Chiong nga mamalik sa paggamit ingon man pagpamaligya og gidiling drugas ang mga tawo nga mitahan na sa mga awtoridad.
Matud ni Chiong nga wa siyay supak sa desisyon ni Presidente Rodrigo Durtete tungod kay kinahanglan man sab ang paglimpyo sa Philippine National Police base sa mga balita nga mahibaw-an labot sa ilang grupo.
Apan mipadayag siya sa iyang kabalaka nga mobalik sa ilang naandan nga ilegal nga kalihukan ang mga tawo nga nitahan na sa ilang mga kaugalingon ug nisaad nga moundang na sa gidiling drugas.
Dako ang pagtuo ni Chiong nga di makaya sa Philippine Drug Enforcement Agency (PDEA) ang pagsumpo sa ilegal nga drugas tungod kay kaniadto nga gitabangan pa gani sila sa kapulisan wa man gani kini masumpo.
Gimandoan sa mayor ang ilang hepe sa kapulisan nga si P/Supt. Gregorio Galsim nga ipadayon ang ilang anti-criminality campaign.
Hinuon gipasalig ni Galsim nga bisan pa man ug di na sila ang lead agency sa paghimo og operation labot sa drugas padayun ang ilang intelligence gathering aron maoy ihatag ngadto sa PDEA 7 sa tuyo nga sila na ang mo-operate niini.