GIKONBIKTO sa korte ang usa ka mananagat nga nasakpan nanagat nga sakop sa kadagatan sa lungsod sa Oslob nga hugot nga gidili sa balaod.
Si Gigi Narciso gihukman nga mabilanggo sud sa unom ka buwan human nakaplagan nga sad-an sa kasong kriminal sa paglapas sa Section 86 sa Republic Act 8550 nga giamendar sa Republic Act 10654.
Base kini sa 21 ka pahina nga desisyon nga gipakanaog ni Presiding Judge Francis Rainier Navarrete sa 10th Municipal Circuit Trial Court sa Samboan niadtong Pebrero 15, 2017.
Si Narciso, 50, taga Amlan, Negros Oriental, gimandoan usab sa hukmanan nga mobayad og P300,000 nga multa ug pagsakmit sa kagamitan sa pagpanagat.
Apan sa buwag nga kasong kriminal, siya giabswelto ni Navarrete human napakyas ang prosekusyon pagmatuod nga naggamit ang akusado og ekipo nga gitawag og SMS purse seine active gear sa pagpanagat nga sakop sa municipal waters ubos sa Section 90 sa RA 8550.
Niadtong Hulyo 17, 2016 sa buntag, ang grupo ni Bimbo Gilles nga mga sakop sa Bantay Dagat sa lungsod uban si PO1 Mark Rowland Maata nagpahigayon og seaborne patrol sa kadagatan nga sakop sa Oslob gamit ang MCBA Sumilon Coral Point Divehouse nga gi-commissioned sa munisipyo.
Pasado alas 5:00 sa buntag nianang Hulyo 18, 2016, nasigpatan sa grupo ang usa ka yellow nga panagatan, f/b RV 9 nga giluwanan ni Narciso ug kaubanan nga nanagat sa dagat sud sa 15 kilometros gikan sa baybayon sa Oslob nga gidili sa balaod.
Si Narciso, nitestigo niadtong Nobiyembre 23, 2016 ug sa iyang sa judicial affidavit, nangangkon nga di siya ang kapitan sa RV 9.
Apan isip maoy labing taas nga opisyal niadtong tungora nga giingong maoy nagmandar sa iyang mga sakop nga luwan sa panagatan, siya ang gihukman nga mabilanggo sud sa unom ka buwan ug gipamulta.