Kapin sa 20 ka mga kompaniya nga nagbase sa dakbayan sa Sugbo ang nilagda og statement of commitment (SOC) isip timaan sa ilang pagdawat sa mga gradwado sa Asian College of Technology (ACT) bisan kon walay transcript of record (TOR).

Usa kini ka lakang sa kagamhanan sa dakbayan sa Sugbo bahin sa balanse nga matrikula ngadto sa ACT gumikan sa conflict of interest nga giatubang sa tag-iya hinungdan nga hangtod karon ang gatusan ka mga scholar sa siyudad nga graduate sa maong tunghaan wala pay gihuptan nga TOR.

Si Mayor Michael Rama maoy nianunsyo sa maong kalambuan ug iyang gihangop ang lakang sa mga kompaniya sama sa Marco Polo Hotel, Eperformax. PG Holdings, Cebu Home and Builder Centers, Cebu Overseas Hardware ug daghan pang uban.

“I hereby state this commitment to support the Cebu City Government’s effort of ensuring a decent future for its residents, including students or graduates of ACT,” tipik sa ilang gilagdaan nga SOC.

Ang mayor nagkanayon nga mo­daghan pa ang gidaghanon sa mga kompaniya nga molagda sa ilang statement of commitment aron paghangop sa mga tinun-an nga gradwado sa ACT sa mosunod nga mga adlaw.

Una niini, ang mga graduate sa maong tunghaan nabalaka nga walay modawat kanila nga kompaniya sanglit wala silay mga TOR nga maoy sagad pangayuon sa mga kompaniya panahon sa ilang pagpangaplay.

Ang mga kompaniya giimbitar sa usa ka conference ni Rama kagahapon sa City Sports Center may labot sa kabalaka sa mga tinun-an nga di sila hatagan og TOR sa ilang eskwelahan gumikan sa pending nga kaso .

Si Rama nagkanayon nga di nila talikdan ang mga tinun-an ug di usab sila modagan sa ilang obligasyon sa pagbayad sa P135 milyones nga balanse sa matrikula kon mohukom ang korte nga pabayran.