DI mominos 58 ka mga pasahero ang nangaangol, 23 niini na-admit sa lainlaing mga tambalanan sa dakbayan sa Sugbo, diin upat ang seryuso ang pagkaangol, human nagbangga ang usa ka pasaheroan nga fastcraft ug barge sa tungod mismo sa East Asia Utilities, dayon abot sa Marcelo Fernan Bridge, habig sa dakbayan sa Lapu-Lapu alas 10:01 sa gabii sa Sabado.

Si Coast Guard Cebu Station deputy commander John Manuel Alip niingon nga dili pa sila makatumbok kon kinsa ang sad-an sa hitabo sanglit wala pa makaduso og isig ka marine protest ang mga kapitan sa duha ka mga sakyanan sa kadagatan.

“Masasagot 'yan kung lalabas na ang marine protest. Doon tayo mag-babase kung sino talaga ang may kasalanan,” pamulong niini atol sa press conference kagahapon sa buhatan sa Coast Guard District Central Visayas.

Hangtod alas 10 kagabii kinahanglan maduso sa mga kapitan ang marine protest alang sa lawom nga imbestigasyon sa PCG sa hitabo.

Apil sa naangol ang kapitan sa fastcraft, mv St. Braquiel, nga si Reniero Maurin.

Gikan sa pantalan sa dakbayan sa Ormoc ang fastcraft luwan ang 9 ka mga opisyal ug tripulante ug 90 ka mga pasahero, usa niini menor-de-edad, 14, samtang gikan sa pantalan sa Estancia, Iloilo ang barge nga gikargahan og mga kinahon sa mga botelya sa beer nga way sud.

Si Alip nibutyag nga pulos naa sa inbound lane sa traffic separation scheme sa Mactan Channel ang mv St. Braquiel, Supercat Fast Ferry Corp. sa 2Go Shipping, ug barge, SMC No. 8 sa San Miguel Corp. Shipping and Lighterage Corp.

Si Alip nagkanayon kon ang barko naa na sa sulod sa Mactan Channel, kinahanglan di mominos sa 5 knots ang gikusgon sa dagan niini.

Matod niya ang barge, may gibug-aton nga 1,302.68 gross tonnage, naa sa unahan, nagdagan sa gikusgon nga 2.8 knots sa dihang nakasud na sa Mactan Channel samtang naa sa luyo ang mv St. Braquiel, nga wala pa matino ang gikusgon sa dagan.

Apan sa pag-abot sa duha ka mga sakyanan sa tungod mismo sa East Asia Utilities duol sa Cebu Yacht Club ug Marcelo Fernan Bridge, nahitabo ang panagbangga.

Tungod sa hitabo, nalum­ping ang unahan sa tuo nga bahin sa fastcraft samtang nadanyos ang walang bahin sa barge.

Si Alip nidugang ang mv St. Braquiel dunay maximum capacity nga moabot sa 247 ka pasahero ug may gibug-aton nga 292.95 gross tonnage, nga nahimo niadtong 1995.

Alas 11:30 sa gabii, naabot sa dapit ang igsuong fastcraft sa mv St. Braquiel, mv St. Jhudiel, diin gipabalhin og sakay ang mga pasahero.

Alas 11:45 sa gabii, nidunggo sa pier 4, dakbayan sa Sugbo ang mv St. Jhudiel, luwan ang nangaangol nga mga pasahero.

Ang mv St. Braquiel luwas nakadunggo sa Mactan Shipyard uban sa tabang sa mt PSC Matatag ug DF-318 samtang ang barge naa sa wharf sa SMC sa Barangay Looc, siyudad sa Mandaue.