NILANDING sa balay tambalanan ang usa ka dalagita human samaran ang liog niini dihang gilabnihan og kwintas niaging adlaw sa Cogon, dakbayan sa Cagayan de Oro.
Giila ang biktima nga mao si Roshel Gimbao, 16, residente sa Barangay Bugo ning dakabayan.
Sa inisyal nga report sa Northern Mindanao Medical Center diin nagpatambal ang biktima, gibutyag niini nga igo lamang siyang nagbaklay sa dapit dihang kalit lang gilubnot ang iyang kwintas.
Gibutyag sab niini nga nasamdan ang iyang liog tungod kay maorag mahikogan siya hinungdan nga nimarka apan maayo na lamang kay iyang gihangyo ang suspek nga siya maoy mokuha sa kwintas aron ihatag niini.
Human sa insidente daling misibat ang suspek samtang ang biktima nakamatikod og dugo sa iyang liog hinungdan nga nagpatambal kini sa naasoy’ng balay tambalanan.
Mobalor og P4,000 ang maong kwintas kay daw regalo kini sa iyang inahan kaniya niadtong pasko.
Ang insidente gipatala na usab sa biktima sa Police Station 2 sa Cogon. (SVB)