TRENDING sa social media ang pagkakaplag sa usa ka dakong isda nga giingong oarfish niadtong Sabado sa udto sa baybayon nga bahin sa Barangay Gusa, ning dakbayan sa Cagayan de Oro.
Daghan sa mga residente ang nagpost og hulagway niini diha sa Facebook ug pipila sa katawhan ang mikomento nga ila kining gikabalaka tungod sa report nga kung adunay makita nga susama niining klase sa isda daw adunay dakong kahulogan niini sama sa posibleng linog nga masinati.
"Mahadlok gyod ko kay ingon man gud nila nga kung makakita anang oarfish naay posibleng linog nga moabot," matud ni Evangeline Cagas sa SuperBalita.
Apan kung pasultihon si Marcial Labininay, kinsa Regional Director sa Philippine Institute of Volcanology and Seismology-Northern Mindsanao, nibutyag nga dili angayan magtou sa mga storya lamang.
Matud niini nga ang mga natural nga kalamidad walay bisan kinsa nga makatagna ug kung posible ang paghidangat sa kalamidad mas maayo ang pagpangandam gyod kanunay nga ubanan sab dayon kini sa pag-ampo sa labawng makagagahom.
Samtang ang kapitan sa Barangay Gusa nga si Marlon Tabac ang miapela sa katawhan ug iyang mga residente nga dili mahadlok niini tungod kay ang isda daw susama sa tawo nga ginama gihapon sa labawng makagagahom ug dili ang bisan unsang matang sa mga mananap maoy mohimo sa katalagman.
Ang napalgang oarfish ang giingong buhi pa dihang nakita apan namatay dihang gidala sa baybayon. Kini adunay gitas-on nga gibana-banang moabot ngadto sa 10 ngadto 15 feet.
Motagna
Sa usa ka artikulo nga gipagawas sa Japan Times, gisulti ni Kiyoshi Wadatsumi nga ang mga isda sama sa oarfish nga makita lamang sa lawom kaayo nga bahin sa dagat ang sensitibo kaayo kung adunay paglihok ilawom niini.
Kahinumduman nga sa wala pa nabati ang pagtay-og sa Surigao City diin moabot ngadto sa 6.7 magnitude ang kakusgon, adunay oarfish nga unang napalgan sa Agusan de Norte, niaging adlaw sa lungsod sa Carmen sa Agusan del Sur ug uwahi kining nakita sa Barangay Gusa.