GITUOHANG nag-over heat nga usa ka unit sa piso net ang gitudlong hinungdan sa kalayo sa natigayong sunog alas 2:45 niadtong Dominggo sa kaadlawon, Pebrero 19, didto sa Sto. Niño, Tancontian Street, Barangay Agdao Proper, Agdao District, dakbayan sa Davao.
Ang Bureau of Fire Protection Davao Central Fire District nagbutyag nga dunay 17 ka mga balay ang nanga-ugdaw samtang duna sila'y natala nga 26 ka mga pamilya nga nasunogan.
Migula sa inisyal nga imbestigasyon sa kabomberohan nga electrical short circuit ang hinungdan sa kalayo.
Si Danilo Lao, tag-iya sa piso net nagbutyag sa mga tigbalita nga iyang natimahoan ang baho sa sunog nga wire ug iyang nakita ang baga nga aso gikan sa iyang piso net ug daling midako ang kalayo.
“Nakabaho ko'g sunog sa wire ug miaso ang piso net sa ubos dayon nidako ang kalayo,” sulti ni Lao sa mga tigbalita.
Ang City Social Services and Development Office padayong nag-validate sa mga pamilya nga nasunogan ug nang-apud-apod og pasiunang tabang ug mga pagkaon.