GIRELIBUHAN na ang teacher-in-charge sa Santicon Elem. School sa lungsod Badian, nga nasikop sa mga sakop sa Provincial Intelligence Branch tungod sa pagsuyop ug shabu. Posible unya kining mag-atubang og reklamong administratiba sa Department of Education.

 

Sigun sa Cebu Provincial Schools Division, giilisan na ang magtutudlo nga si Reynante Aliñabon isip labaw sa Santicon Elem. School sa lungsod sa Badian.

 

Si Aliñabon nadakpan niadtong Mayo 27 sa Poblacion, Badian, human maabti nga nagsuyop sulod sa usa ka drug den.

 

Matod ni Cebu Schools Division superintendent, Dr. Arden Monisit, hingpit na nga nagbutang ang DepEd og principal sa nahisgutang tunghaan aron dunay makadumala og insakto niini, human usab nakontrobersiyal ang kanhi labaw sa tunghaan.

 

Gihulip kang Aliñabon si Ms. Macrina Carteciano ug pormal na kining nilingkod sa pwesto niadtong Huwebes.

 

Gitug-an ni Monisit nga nahibawo na ang regional director sa DepEd7 labot sa gidangatan ni Aliñabon.

 

Gipaabot na lang karon ang hukom ni Dikretor Juliet Jeruta kon mopahigayon ba usab og administrative investigation ang DepEd sa kaso sa maong magtutudlo.