USA ang samdan atol sa pinusilay nga nahitabo sa dalan Kamuning, Barangay Tisa, dakbayan sa Sugbo, pasado alas 2:00 sa milabayng hapon tungod sa gidiling drugas.
Ang samdan sa iyang tangkogo mao si Arnel Parba, 29, taga Sityo Manol, Barangay Tisa.
Gitumbok nga nakapusil kaniya mao si Lyme Anodling, hingkod na ang panuigon, usa ka estambay.
Sa pasiunang inbestigasyon ni SPO4 Alex Dacua ug mga kaubanan sa Homicide Sectionsa Cebu City Police Office, sakay sa motorsiklo ang biktima ug niparada daplin sa dalan kay naghuwat ni Anodling.
Subay sa pakisusi ni Dacua nga gipaabot sa biktima ang suspek nga moagi sa dapit tungod kay iya kining pusilon.
Apan wa makabantay ang biktima nga una diay nga nakakita kaniya si Anodling, mibunot kini og armas ug dayong pusil kang Parba, kinsa nibunot usab sa iyang armas.
Nahitabo ang pinusilay.
Nakita nga nagkadugo ang tangkugo ni Parba ug si Anodling daling nakasibat.
Samtang si Parba nga samaron, nakadagan paingon sa ilang balay ug gidala sa tambalanan.
Niresponde ang kapulisan. Sa ilang pag-abot sa dapit, napalgan ang upat ka mga kabhang sa mga bala sa armas nga kalibre 45 nga pistola.
Wa na maabti sa kapolisan ang biktima nga samdan human nilayas human sa paghunad sa doktor sa iyang samad sa tangkugo.