NAPISAT ang ulo sa security guard human nalatayan sa oil tanker dihang napasok ilawom sa sakyanan niadtong Huwebes sa alas 7:00 sa gabii sa Barangay Poblacion, lungsod sa Borbon.

Si Eliseo Estrobo, 33, minyo, taga Barangay Tabunan, Borbon, sikyu sa Palawan Pawnshop, patay dihadiha human sa hitabo.

Nitahan sa kapulisan si Bert Teopiz, 47, minyo, taga Barangay Tumandac, lungsod sa Alegria, drayber sa oil tanker (RJD-852) nga gipanag-iya sa Merit Gas Network Corporation.

Si PO1 Ernesto Pablo sa Borbon Police Station nagkanayon nga si Estrobo nagsakay sa iyang motorsiklo nga nagsunod sa oil tanker gikan sa dakbayan sa Sugbo paingon sa Tabogon.

Ang biktima ni-overtake sa oil tanker apan kalit siyang ni-brake kay dunay gikasugat nga laing sakyanan hinungdan sa pagsarasay sa motorsiklo ug natumba.

Gidimalas ang biktima kay ang motorsiklo nga iyang gisakyan napasok sa ilawom sa oil tanker hinungdan nga napisat ang iyang ulo.

“Nabuak ang iyang ulo. Wa na mahitsura. Pwerting bug-ata sa oil tanker,” dugang ni Pablo.

Human sa hitabo, ang drayber boluntaryong nitahan sa kaugalingon. Subay ning pagsuwat, nagpadayon ang sabotsabot sa pamilya sa namatay ingon man kompaniya sa drayber.

Samtang, patay ang 17-anyos ug naangol ang iyang angkas dihang nasaghid ang ilang motorsiklo sa gikasugat nga 10-wheeler truck kagahapon sa alas 9:00 sa buntag sa Barangay Maravilla, Tabuelan.

Si Ariel Tuling, 17, nagpuyo sa nahisgutang lugar ug dead-on-arrival (DOA) dihang nadangat sa tambalanan, samtang naangol ang iyang ig-agaw nga si John Roque Tuling 15.

Si PO1 Ver Hortelano, desk officer sa Tabuelan Police Station nga nahinabi sa Sun.Star Superbalita, nagkanayon nga ang mga biktima sakay sa ilang motorsiklo.

Gikasugat niini ang 10-wheeler truck (YKH-805) gimaniho ni Melchor Romo, 58, taga Barangay Ilihan, Tabogon, nga nagkarga ug puno sa bas ug grabi paingon sa San Remegio.

Samtang nagdulhog ang 10-wheeler truck, nagsubida ang motorsiklo sa mga biktima dihang nasangit sila sa likod nga ligid busa nangabunal ang ulo sa karsada.