GIKATAKDA nga ka­rong Lunes na paatubangon sa buhatan sa Land Transportation Office (LTO) 7 ang blocktimer ug komentarista nga si Roger Cimafranca human way nakita ang maong buhatan nga rekord sa plate number niini ug ubos sa iyang ngan.

Samtang did-an na usab sa sibyaanang dyLA si Cimafrance nga makasibya sa iyang programa matag Sabado tungod kadaut nga iyang nahatag.

Sa imbitasyon nga gi­padala sa LTO 7 kagahapon ngadto kang Cimafranca pinaagi sa sib­yaanang dyLA kung diin siya misibya alang sa iyang blocktime nga programa, ala 1:00 sa hapon gi-schedule siya nga moatubang.

Matod sa regional director sa LTO 7, duha ka mga reklamo ang kinahanglan nga atubangon ni Cimafranca.

Usa niini kon nganong way rekord ang LTO sa plate number nga iyang gigamit nga aduna pa’y sticker sa LTO.

Si Tancinco nipasabot nga usa ka special law ang pagdili sa paggamit sa sticker sa LTO.

Nakuryuso usab si Tancinco kon giunsa pagkuha ni Cimafranca ang maong talagsaon nga sticker.

Ikaduha mao kining wa sila’y nakita nga rekord sa ilang data base nga ngan ubos kang Cimafranca bisan unsa nga sakyanan, motorsiklo man o four-wheel vehicle.

Gibutyag ni Tancinco nga aduna’y duha ka mga Roger Cimafranca ang nakita nila sa ilang record, apan wa sila’y nakita nga aduna’y middle initial nga susama sa brodkaster.

Sa pagkakaron di pa makabutyag si Tancinco kon unsa nga kalapasan sa balaod ang ipasaka kang Cimafranca tungod kay kinahanglan pa nila nga masuta ang dokumento ug papeles niini ingon man ang motorsiklo niini.

Dugang ni Tancinco nga kinahanglan lakip nga dad-on ni Cimafranca ang motorsiklo niini tungod kay nagarantiya kini nga aduna siya’y papeles sa iyang temporaryo nga plaka ug rehistro sa iyang motorsiklo.

Kon pananglitan di mo­tunga si Cimafranca karong Lunes, padad-an og lain nga imbitasyon ug kon di gihapon kini motunga, i-alarma na nila ang driver’s license niini.

Assume

Sa pagpakighinabi sa Sun.Star Superbalita kang Cimafranca siya ni­butyag nga gi-assume lang niya ang motorsiklo sa usa ka kompaniya nga “Rusy”.

Kapin sa duha ka tuig na kini niya apan wa pa siya makahigayon og pa-transfer ngadto sa iyang ngalan.

Usa ka Reygan Abadiez ang nakapangan sa Official Receipt ug Certificate of Registration sa maong motorsiklo. Hangtod karon wa pa niya makuha ang deed of sale niini.

Dugang ni Cimafranca nga panahon pa ni kanhi LTO 7 regional director Raul Aguilos niya nakuha ang sticker nga LTO nga kinsa personal niya nga gipangayo.

Paningkamutan usab niya nga makatunga sa buhatan sa LTO 7 kon pananglitan wala’y importante nga lakaw ang motumaw.

Gikatakda nga sa Lunes usab siya kinahanglan nga musumiter sa iyang explanation ngadto sa Association of Barangay Councils (ABC) kinsa kasamtangan siya nga gisuspenso isip liaison officer.

Di pasibyaon

Ang management sa sibyaanang DYLA di na usab motugot kang Cimafranca nga mosibya sa iyang programa.

Matod ni station ma­nager Jun Tagalog sa post sa dyLA sa Facebook account, nga nakahimo og kadaut sa imahen sa sibyaanan si Cimafranca.

Gikompirmar usab ki­ni ni Tagalog sa iyang text message sa Sun.Star Superbalita.

“Dili ko kaputol sa programa kay naa man mi contract. Pero dili na ko motugot nga motingog ug moprograma siya sa dyLA,” matod ni Tagalog sa iyang text message.

Naa ra kang Cimafranca kon kinsa ang iyang papulihon sa paghupot sa iyang programa, dugang ni Tagalog.