Mongaya: Edsa anniversary

MAHINUNGDANON ug makahuluganon alang kanako kining pagsaulog sa sumad sa pag-alsa sa Edsa. Di nato angay kalimtan nga atong nagpalagpot ang usa ka diktador ug napahugno ang usa ka diktadurya.

Di kita angayang makalimot labi na karong nagpadayon ang paninguha sa anak sa dik­tador nga makabalik sa Malakanyang.

Nakahibawo kita nga dakong bahin sa mga tigsuporta ni Presidente Rodrigo Duterte ang wala mosuporta kang Bongbong Marcos diha nidagan siya sa miaging Mayo 2016.

Ang kandidato ni Presidente Duterte alang sa pagka bise presidente mao si Sen. Alan Peter Cayetano ug ubay-ubay ang nisuporta kaniya.

Ang political vehicle ni Presidente Duterte nga mao ang PDP-Laban tipik sa halapad nga koalisyon batok sa diktadurya ni Marcos dihang nibuto mismo ang pag-alsa sa Edsa.

Dili kita makalimot nga sila si Inday Nita Cortes-Daluz, Dodong Holganza, Tony Cuenco, ug Nene Pimentel – nga lakip sa atong mga haligi sa pakigbisog batok sa diktadurya – mga haligi usab sa PDP dinhi sa Sugbo ug sa Mindanao.

Dili ako makalimot nga kaniadtong 1983 ngadto sa 1984, sa makadaghan nga kuyog ako ni Fr. Rudy Romano sa mga tigum diha sa balay ni Inday Nita aron planuhon ang mga dagkong lihok protesta dinhi sa Sugbo. Niadtong tungora, sakop ako sa secretariat sa mga al­yan­sa sama sa Nagkahiusang Sugbo alang sa Demokrasya (Nasud) ug Bagong Alyansang Makabayan (Bayan). Kuyog kining maong mga alyansa sa mas lapad pa nga koalisyon nga mao ang Cebu Oust Marcos Movement for Nationalism and Democracy (Command).

Unsay akong punto?

Atong gihisgutan kini aron mapakita nga sayop ang giduso nga panglataw karon nga ang tanang mga kontra ni Bongbong Marcos, yellow.

Lapad nga bahin sa mga tigsuporta ni Presidente Duterte ang supak nga mabalik ang usa ka Marcos sa Malakanyang. Mao kini ang angayang hup­tan nga kamatuoran aron makasabot sa mga lain-laing mga kalamboan sa politika ug dili madala sa propaganda.

Filinvest

Nabalita karon nga moatras na ang Filinvest sa pagpalit niini og luna diha sa SRP kaniadtong panahon ni mayor Mike Rama tungod kay wala maka-deliver ang kampo sa mayor sa gilagda sa kontrata human mobayad ang Filinvest.

Lakip sa wa mahatag sa adminitrasyon ni Rama mao ang importanteng dokumento sama sa mga titulo. Sa sayo pa, atong nasayran sab nga daw maayo na ang relasyon sa Ayala Land Inc. ug ang Cebu City Hall nga gipangulohan na karon ni Mayor Tomas Osmeña.

Buot ipasabot, ang SM na lang ang nagpabiling nisukol sa City Hall. Karon, makapung kaha ang mayorya nga Team Rama niining pagbaligya og laing tres hektarya nga yuta sa SRP sa presyo nga P110,000 per square meter. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph