USAHAY makapangutana ta nga pagkalapad sa dagat abot man gani sa Bohol apan nganong magkabangga man gyud nang mga barko. Mas daghan pang marine disaster o mga insidente sa kadagatan kay sa ma-crash nga mga eroplano. Ug kasagaran sa mga insidente gumikan sa human error o sayop sa mga kapitan nga nagmaniho sa barko. Pipila ka tuig ang nakalabay ang barko nga iya sa 2Go Shipping Lines, St. Thomas de Aquinas mibangga sa container vessel sa Sulpicio Lines diha sa Lawis ledge sa Talisay City. Daghan ang patay ug aduna pay mga missing.

Niadtong miaging gabii, na­hitabo na usab ang panagbangga sa duha ka mga barko nga naglambigit sa Fastcraft nga St. Braquiel sa Supercat Fast Ferry Corp. sa 2Go Shipping Lines ug ang barge nga iya sa San Miguel Corp. diha sa Mactan channel. Ang fastcraft gikan sa Ormoc City nga adunay luwan nga 90 ka mga pasahero samtang ang barge nga nagkarga og kinahon nga basiyo sa botelya sa beer gikan sa Estancia, Iloilo. Daghan ang naangol nga mga pasahero.

Unsa may hinungdan? Gumikan sa kangitngit sa dagat? Gumikan sa kadanghag sa duha ka kapitan o ba kaha nahubog ang kapitan sa barge kay nagkarga kini og beer? Dili pa masuta sa Coast Guard kon kinsa ang sad-an kay wala pay marine protest aron ma-imbestigahan ang maong insidente.

Unya ang nakaporke ra ba aning maritime incident, dili masilutan ang mga kapitan labi pa ang nga tag-iya sa barko. Dili mapasakaan og kasong kriminal. Nakadungog mo og kapitan sa mga nalunod nga barko nga dakong buhi napriso? Lahi sa mga driver sa kamad-an nga mamultahan o mapriso gyud kon masuta nga sad-an ug adunay patay sa insidente.

Ang pagsilot sa kapitan wala maapil sa maritime laws kay nagtuo man ang mga nagpanday sa balaod nga mamatay o magpakamatay ang kapitan kon adunay insidente sa ilang gimaniho nga barko. Didto sa ubang nasud, kon dili mamatay ang kapitan sa insidente, magsuicide man. Apan dinhi sa ato, magpabaga man. Way konsensiya.

(bobby@sunstar.com.ph)