NIADTO ra untang Pebrero 15 mosugod sa pag-operate ang hybrid nga road train sa dakbayan sa Sugbo, apan, matod pa, gumikan kay wa pa diay mahingpit ang evaluation sa ilang gihimong road test niadtong Enero 31, wa lang una kini idayon.
Si Rafael Yap, ang pangulo sa Cebu City Transportation Office (CCTO), mibutyag nga lakip usab sa ilang susihon ang mga rota niini kon haom ug hamugaway ba kini nga maagian.
Ubos sa gisugyot nga mga rota, ang road train magsugod sa Fuente Osmeña oval mopaingon didto sa Osmena Boulevard, mo-left turn sa P. del Rosario ngadto na sa Imus New Road ug motuyok ngadto sa Commerce ug Benedicto Street dayon mopatighulog sa Maxilom Extension.
Motadlas usab kini N. Bacalso Avenue, B. Rodriguez Street dayon balik sa Fuente. Sa ato pa, magtuyok-tuyok kini sa mga nag-unang dalan sa sentrong bahin sa dakbayan.
Giingon nga ang road train daw sama sa lima ka bus ang gitas-on nga mokarga og 240 ka mga pasahero.
So kon kining rotaha maoy tumanon, sa ato pa kadtong mga dug-ol lang mga mga pasahero ang giserbisyuhan niini.
Kini maoy angay natong kabalak-an kay sa iyang gidak-on, natural lang siguro nga magsigi kini og hunong-hunong kay dug-ol ra man lagi ang iyang mga pasahero.
Kini maoy dakong risgo sa atong trapiko kay sa iyang gidak-on lang daan makabalda man gyud sa ubang mga sakyanan.
Salikwaot man sab kaayo og ibutang nila og lagyo ang mga loading ug unloading areas kay modistansya na man sab ang mga pasahero sa ilang destinasyon.
Di sab ni mahimong pabiyahi-on gawas sa sentro sa siyudad, sama sa Talamban, kay gagmay man og kalsada.
Sa laktod nga pagkasulti, sa pagkakaron dili sulbad sa trapiko sa siyudad ang road train, gawas lang kon kini adunay kaugalingong lane.