GIKANSELAR sa technical working group (TWG) sa Bids and Awards Committee (BAC) ang kontrata sa PLD Construction nga nakadaog sa bidding aron unta pagtrabaho sa P4.9 milyones nga drainage system sa barangay Tisa, Cebu City niadtong 2011.
Si Atty. Jose Daluz III, pangulo sa TWG, nagkanayon nipadangat kanila og komunikasyon ang tagdumala sa PLD Construction nga di na sila motrabaho sa proyekto nga manukad gikan sa Santa Teresita Village sa dalan Emerald.
Gihimong rason sa kompaniya mao ang pagmahal sa construction materials nga gamiton sa drainage.
Ang kapakyas pagtrabaho sa drainage maoy gitumbok nga hinungdan nga di na masagang niini ang kadaghan sa tubig nga moagi.
Mga residente sa subdivision ug mga opisyal sa barangay nakugang dihang niresulta sa pagbaha sa basura atol sa pagbunok sa uwan niadtong Mayo 29.
Si Kapitan Phillip Zafra nagkanayon nga human niatras ang PLD, iyang giduso ngadto sa TWG nga i-award sa ikaduhang lowest bidder ang proyekto aron matrabaho.
Wa siya masayod kon nganong wa ipatuman ang maong proyekto sa kanhi kapitan sa Tisa.
Apan si Daluz nagkanayon nga nahukman sa TWG ang pag-rescind sa kontrata tali sa PLD human niatras ang kontraktor.
Si Daluz nitug-an sa Sun.Star Superbalita nga ilang ipatawag ang contractor sa sunod meeting sa TWG-BAC, kinsa kasamtangan nga nagtrabaho sa drainage duol sa village sa posibilidad nga ipatuman ang contiguous contract ubos sa alternative mode of contract base sa Republic Act 9984.
Tuyo niini mao nga mapaspasan ang pagtrabaho sa proyekto aron di na masubli ang nahitabo niadtong Mayo 29 diin nanggawas ang mga basura gikan sa manhole nga niapekto sa mga molupyo ug nakahatag og labad sa ulo ni Zafra.
Si Daluz nagkanayon nga kon mosugot ang contractor nga nagtrabaho sa lugar sa contiguous contract, hayan masugdan sa d pa matapos ang Hunyo apan kon subli silang mopahigayon og bidding, hayan maabtan pa og dul-an duha ka buwan sa di pa masugdan ang proyekto.