Super Bilib: Edukasyon ang ilang ikabilin

ADUNAY mga tawo nga mauwaw tawgon og taga bukid. Apan lahi kining usa ka amahan nga mapasigarbuhon sa iyang pagka taga bukid ug pagka mag-uuma.

Iyang garbo nga siya mag-uuma ug sa samang higa­yong negusyante sa kabuki­ran kay ang iyang mga abot sa umahan siya ra usab ang mangunay sa pagtumod sa ka­merkaduhan ug maninda niini sa Transcentral Highway.

Iya ning gibuhat tungod sa iyang simple nga damgo alang sa iyang mga anak—sila makahuman og kolehiyo.

Siya si Marlito Codizar, taga barangay Pung-ol Sibugay, bu­kirang tumoy sa habagatang distrito sa siyudad sa Sugbo.

Sud na siya sa 20 ka tuig nga nananom ug nagtinda sa ilang abot sa uma daplin sa karsada nga mao say nahimutangan sa ilang balay.

Maninda

Kon moagi ka sa Transcentral Highway ug makakita ka og display sa mga prutas, u­tanon nga naglaray buyon sa mga balay sa Pung-ol Sibugay nga nahimutang sa utlanan sa Barangay Taptap, kana gipanag-iya ni Marlito.

Siya nanag-iya og lapad nga umahan sa ilang barangay, diin sagad sa produkto mao ang mais, saging, luy-a, repul­yo ug uban pa.

Kaniadto namaligya usab si­ya og mga buwak nga iya ra usab nga mga tinanom.

Gawas sa iyang pagtinda sa mga produkto gikan sa uma, mohatod usab siya og sinako nga luy-a sa kompaniya nga nanghimo og salabat.

Taudtaud na kini niyang suki. Ang sobra sa iyang abot, sa luy-a, iyang ipamaligya sa iyang tindahan.

Mamaligya usab siya og sweet corn sa Carbon market, apan ang dako usab niyang suki mao ang gikan sa Ozamis ug Dipolog City.

Iyang giasoy nga walay pag­hunong ang ilang pagpananom tibuok tuig nga alang kaniya gasa sa Diyos.

Di tanang higayon hinuon swerte kay dunay panahon nga sila maalkanse.

Gawas sa iyang pagpaninda, nag sideline usab siya og buhi og mga baboy nga maoy magsilbing alkansiya sa iyang kinitaan.

Gipadayag ni Marlito nga mokita siya og labing minos P1,000 matag adlaw.

Apan adunay higayon nga di usab kaabot niini hilabi na kon bati ang panahon sama sa kusog nga uwan.

Natuman

Ang magtiayong Cordizar dunay upat ka mga anak.

Ang ilang anak ni Arlene nga si Mylene, 21, bag-ohay lang nakahuman sa iyang kurso nga Hotel Restaurant Ma­nagement (HRM) sa University of Cebu.

Kini bunga sa ilang paningkamot aron nga makahuman ang iyang mga anak sa pagtungha.

Hinuon ang usa niya ka a­­nak nga si Melanie wa na ni-eskwela samtang ang mga manghod nga sila si Raymart ug Irene naa sa high school.

Sa hinayhinay nga paningka­mot sa magtiayong Marlito ug Arlene, nakapalit na sila og multi-cab nga kargahan sa ba­ligyaon ug second hand nga awto alang sa ilang suroysuroy.

Matod ni Marlito nga wa siyay laing pangandoy taliwa sa kalisod kaniadto nga makatiwas sa pag-eskwela ang iyang mga anak ug mahatagan og maayong kaugmaon.

Wa man tuod siya makahuman sa pagtungha tungod sa ilang kakabos kaniadto, ilang giseguro sa iyang asawa nga makab-ot kini sa ilang mga anak ang wa nila mahimo.

Alang kanila, wa silay dakong bahandi nga ikabilin sa iyang mga anak kon dili ang edukasyon nga maghatag u­­­sab kanila og mahayag nga kaugmaon.

Ilang garbo nga pinaagi sa yano nga panginabuhi, ilang masud-ong ang bunga sa ilang paningkamot.