SA ikaduhang semana sa Marso, moepekto ang P13 nga umento sa minimum nga suweldo sa mga mamumuo sa Central Visayas kon way kakulian sa pagpirma sa mga miyembro sa Regional Tripartite Wages and Productivity Commission sa bag-ong wage order.

Si RTWPB 7 chairman Exequiel Sarcauga nikompirmar nabalik na sa ilaha ang Wage Order No. 20 niadtong Dominggo human ma-review sa National Wages and Productivity Commission sa kaulohan.

“Gi-review nila kon naa bay inconsistencies, minor corrections sa wage order. Gi-enhance nila ang basic elements sa wage order,” pamulong ni Sarcauga, director sa Department of Labor and Employment (Dole) 7, sa pakighinabi sa Superbalita Cebu.

Sa dihang ang direktor nahinabi ning mantalaan, duha pa lang sila ang nakapirma sa wage order, siya ug si Philip Tan, representante sa management sector sa RTWPB 7.

Ang wage board gilangku­ban og unom ka mga miyembro ug usa ka chairman- duha ka representante gikan sa labor sector, duha sa management, ug tulo gikan sa gobiyerno apil ang Department of Trade and Industry, National Economic and Development Authority ug Dole.

Apil sa mga miyembro sa RTWPB 7 mao sila si Jose To­mongha, chairman sa Al­liance of Progressive Labor­-Visayas ug Atty. Ernesto Carreon sa Associated Labor Union-Trade Union Congress of the Philippine, mga representante sa labor sector; Atty. Hidelito Pascual, representante sa management sector; DTI 7 Director Asteria Caberte, ug Neda 7 Director Efren Carreon.

Matod ni Sarcauga kon makapirma na tanan, ang mga sakop sa RTWPB 7 karong adlawa iduso ang Wage Order No. 20 sa pagpublikar sa mantalaan nga mabasa sa tanan.

Kon pananglit mapublikar ugma, moepekto ang bag-ong suhulan human sa 15 ka adlaw, hayan sa Marso 9.

Kon kini mahitabo, mahimo na nga P366 ang matag adlaw nga minimum nga sweldo alang sa mga trabahante nga nanarbaho sa Class A nga mga siyudad sama sa Sugbo, Mandaue, Lapu-Lapu, Talisay, Na­ga, Carcar, ug Danao ug mga lungsod sa Cordova, Consolacion, Liloan, Compostela, Minglanilla ug San Fernando.

Samtang, P333 sa Class B nga mga siyudad sa Toledo ug Bogo ug ubang lungsod sa Sugbo gawas sa mga isla sa Bantayan ug Camotes.

Mahimo na nga P323 ang minimum sa Bohol ug Negros Oriental samtang, P308 sa mga lungsod sa Siquijor ug mga isla sa Bantayan ug Camotes.