DUHA ang patay ug usa ang kritikal sa panangbangga sa usa ka sports utility vehicle (SUV) ug Suzuki mini van sa Sanayon Site, Barangay Pasil, Santander, Sugbo kagahapon sa alas 6 sa buntag.

Namatay ang driver sa Suzuki mini van nga si Crisellano Jugo, 45, taga Barangay Looc Santander, Sugbo ug kauban nga si Junefilo Rubio, 32, taga Barangay Looc.

Samtang ang laing pasahero nga si Rosevelt Sanguinza, 46, taga Barangay Looc Santander nawad-an sa panimuot.

Sila si Jugo ug Rubio gisuwayan pa sa pagdala sa Oslob District Hospital apan gideklarar na kining dead on arrival.

Samtang si Sanguinza na­wad-an sa iyang panimuot ug daling gidala sa Holy Child Hospital Dumaguete.

Nahitabo ang panagbangga human mi over-take ang Isuzu D’Max nga gimaniho ni Engr. Ernesto Mendez, 47, taga Poblacion, Oslob, Cebu sa nag unang motorsiklo samtang nagsubay sa blind curve nga dan sa Sanayon Site.

Wa niya mabantay ang nagpadulong nga Suzuki mini van nga nagdagan sa pikas lane.

Sa imbestigasyon sa San­tander Police, gibutyag ni SPO1 Leonixto Solon nga ang driver nga Mendez nag gikan sa Oslob ug padolong sa Brgy. Liloan aron maghatod sa iyang anak sa skwelahan.

Wa hinuon maunsa ang anak ug si Mendez,apan matod sa pulis, gisakitan kini sa iyang dughan tungod sa impact sa panagbangga. Mhike Dominique C. Fernandez, USJ-R BA Communication Intern