DUL-AN sa 300 ka mga pamilya kansang mga balay naugdaw atol sa sunog nga giisa ngadto sa task force Alpha sa utlanan sa Barangay Labangon ug Tisa.
Mokabat sa 199 ka mga balay ang nangaugdaw sa sunog, diin 135 ang nasunog sa Brgy. Tisa samtang 64 sa habig sa Brgy. Labangon.
Tungod sa sunog, labing minos 275 ka mga balay ang kinatibuk-ang nangaugdaw.
Lamparilya ang gidudahan nga sinugdanan sa kayo, apan susihon pa kini sa kabomberohan.
Matod ni SFO1 Roger Dabalos sa Cebu City Fire Station nga ilang ipatawag si Narciso Roble, nagpuyo sa mao nga balay diin nagsugod ang kayo.
Nakadawat og taho ang kabomberohan nga gaaway ang usa ka magtiayon nga nag-ukopar sa balay.
Sa pasiunang nasayran sa kabomberohan nga dunay gilabay nga lampara, apan ila gihapon kining susihon kon unsa ka tinuod.
Matod ni Dabalos nga way linya sa kuryente ang dapit nga nasunogan kay gikataho nga squatter’s area.
Nadawat ang alarma alas 12:28 sa tungang gabii ug nakontrolar mga alas 2:33 na sa kaadlawon.
Mokabat sa P1.5 milyunes ang gibana-banang danyos.
Base sa record sa Department of Social Welfare and Services (DSWS), moabot sa 156 ka mga pamilya ang nasunogan sa Tisa, nga nagpuyo sa sityo Lutaw-Lutaw, Cacao, Kauswagan ug Luhay.
Samtang 126 ka mga pamilya usab ang apektado sa sityo Sto. Rosario sa Labangon.
Si Lea Ouano-Japson, pangulo sa DSWS nagkanayon nga madawat sa mga nasunogan ang hinabang gikan sa Siyudad sama sa financial assistance ug housing materials.
Ang mga biktima kasamtangan nga gipahiluna sa barangay gym sa tagsa-tagsa ka barangay.
Ang DSWS nihatag na usab og mga pagkaon nga molanat hangtod tulo ka adlaw.
Si Kapitan Phillip Zafra sa barangay Tisa nagkanayon nga didto nila gipahiluna sa La Paloma sports complex ang mga nasunogan sanglit duol ra sa lugar ug pabor para sa mga apektado.
Adunay say lima ka lawak sa Tisa National High School ang gitagana para sa mga inahan nga nagpasuso, tiguwang ug mga masakiton isip panagana sa bati nga panahon.