GIDID-AN sa Maritime Industry Authority sa Central Visayas makalawig ang pasaheroang fastcraft, barge ug tugboat nga nalambigit sa banggaay niadtong Sabado sa gabii sa Mactan Channel.
Si Atty. Jose Cabatingan, tigpamaba sa Marina 7, nibutyag nga suspendido na ang passenger ship safety certificate sa mv St. Braquiel sa Supercat Fast Ferry Corp. ingon man ang cargo ship safety certificate sa SMC No. 8 sa San Miguel Corp. Shipping and Lighterage Corp. ug motor tugboat Philmarine Service Corp. (PSC) Matatag sugod niadtong Dominggo.
Matod niya suspendido usab ang mga lisensiya ni Capt. Reniero Maurin sa fastcraft ug Capt. Edgardo Binolirao sa PSC Matatag, nga maoy nagbitad sa barge.
Si Cabatingan namulong nga dili una tugtan makabiyahe ang duha ka mga sakyanan sa kadagatan nga nalambigit sa aksidente hangtod dili mainspeksyon og balik sa mga technical engineer sa ilang buhatan.
Tumong sa re-inspection ang pagtino kon luwas ba kini sa ilang paglawig og balik.