BAKWION sa Cebu City Government ang pagbaligya sa 19.2 ektaryas nga luna sa South Road Properties (SRP) ngadto sa Filinvest Land Incorporated (FLI) nga nahalin atol sa administrasyon ni kanhi Mayor Michael Rama.

Si Mayor Tomas Osmeña nagkanayon nga aduna na silay inisyal nga kasabutan tali sa FLI aron mabalik sa kustodiya sa City Government ang yuta nga ilang napalit.

“In informal discussion with Filinvest, meaning there is nothing written, its just an approval in principle. There is agreement to rescind the sale and it is subject to legal settlements and accounting settlements,” matod ni Osmeña atol sa press conference kagahapon.

Gitug-an sa mayor nga iuli sa City Government ang kwarta nga nabayad sa FLI apan di pa karon sanglit adunay pay mga dokumento nga gikinahanglan.

Si Rama, sa iyang bahin, kinsa nakabaligya sa 46 ektaryas atol sa iyang ikaduhang termino ngadto sa FLI, Ayala Land Inc. ug SM Prime Holdings Inc., niingon nga temporaryo ra ang kadaugan ni Osmeña.

“Congratulation, mission accomplished by him temporarily,” ang mubo nga pamahayag ni Rama.

Si Tristan Las Marias, vice-president sa Visayas ug Mindanao sa FLI, nagkanayon nga di makaapekto sa mga proyekto sa FLI ang pagbakwi sa kontrata.

Ila gihapon nga prayoridad ang mga proyekto nga nia sa dakbayan sa Sugbo.

Matod ni Las Marias nga naghinaot sila nga kon ibaligya sa Siyudad ang Pond A, hatagan sila og higayon nga makaapil sa bidding o unsolicited proposal.

Ang mayor niingon nga iyang tinguha nga maanular ang pagbaligya sa 19.2 nga yuta sanglit kini nahimutang atubangan sa 60 ektaryas (pond A) mga tubigon pa ug wa pa mataboni og yuta.

Gipasabot niya nga kini mahinungdanon pa sa 26 ektaryas nga napalit sa SMPHI ug Ayala Land Inc sanglit kon di kini makuha og balik sa Siyudad, ang presyo sa pond A moubos og 80 porsiyento kay masalipdan na sa development.