HINAYHINAY na’ng gisugdan ni Olympian Mary Joy Tabal ang iyang pagpangandam alang sa iyang kampanya sa 2017 Southeast Asian Games full marathon nga ipahigayon karong Agusto sa Kuala Lumpur, Malaysia.

Niadtong Dominggo, si Tabal misalmot sa SM2SM Run women’s 21-kilometer half marathon category ug sama sa gilauman, yano niyang naangkon ang five-peat nga kadaugan.

Sa interbyu sa Sun.Star Cebu, igsuong buhatan ning mantalaan, nagkanayon si Tabal nga dili maayo ang iyang oras nga nakuha apan iyang gitataw nga kuntento ra siya sa iyang gipakita. Gipasabot niya nga inanay ang iyang pagpakondisyon gumikan kay layo-layo pa man ang SEA Games.

Sa umaabot nga mga adlaw, si Tabal molarga sa gawas sa nasod alang sa usa ka hugot nga pagpangandam.

Ang produkto sa Southwestern University (SWU) athletics nihuman sa SM2SM race sulod sa usa ka oras, 25 minutos ug lima ka mga segundos aron angkunon ang P70,000 nga ganti.

Ang 27 anyos nga marathoner naglabaw og kapin sa duha ka mga minutos sa 2nd placer nga si Ruffa Sorongon.

Ang 3rd placer nga si Chris­tabel Martes adunay o­­­ras nga 1:29:35.