Bag-ong record sa NBA All-Star

MIKULIT og rekord si New Orleans Pelicans center Anthony Davis dihang nimugna siya og 52 puntos aron pangulohan ang kadaugan sa West batok sa East, 192-182, kagahapon sa Natiional Basketball Association (NBA) All-Star Game sa New Orleans.

Nalabwan ni Davis ang kanhi rekord sa All-Star Game nga 42 puntos nga nakulit ni Wilt Chamberlain niadtong 1962.

Sa usa ka wala’y depensahay nga duwa, nga nahimong dunk festival sa maong kompetisyon, si Davis nimugna og 26-of-39 field goal, nipupo og 20 puntos sa 4th quarter.

Siya ang nahimong labing unang magduduwa sukad ni Kobe Byrant niadtong 2011 nga napiling All-Star MVP sa iyaha mismong homecourt.

“It was amazing,” matod ni Davis.

“That’s what I wanted to do ... get the MVP for this crowd, for this city. This one definitely means a lot to me.”

Ang 373 puntos nga hiniusang nakuha sa West ug East mao ang labing dako sa kasaysayan sa All-Star Game.

Gawas kang Davis, mingkawat sab og dakong atensyon sila si Russell Westbrook, Kevin Durant, Giannis Antetokounmpo ug LeBron James sa ilang gipakitang duwa.

Ang pagkahilambigit ni Davis kang Chamberlain, alang kaniya, maoy labing tam-is sa tanan niyang nahimo.

“The next one I’m going to try to do is 100 points,” dugang ni Davis.

Nalabwan ni Davis ang gipakita ni Westbrook, kinsa nihipos og 41 puntos sulod lanbg sa 20 ka mga minutos nga pagduwa.

Nalantawan na untang ma­kuha ni Westbrook ang iyang ikatulong sunodsunod nga All-Star MVP award apan wala kini tugti ni Davis.

“It shows our guys recognize what the weekend is about,” West coach Steve Kerr.

Si Durant ug Stephen Curry nidugang og 21 puntos matag usa alang sa West.

Ang East gipangulohan ni Antetokounmpo pinaagi sa iyang 30 puntos.

Nidugang og 23 puntos si James samtang niamot og 22 puntos si Kyrie Irving.

“There were a few too many transition baskets allowed,” matod ni East coach Brad Stevens. “But I think that was strictly coaching,” panapos ni Stevens.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph