Gipangmasaker sa Dallas Mavericks ug Boston Celtics ang ilang tagsatagsa ka kontra sa duha ka mga deciding Game 7 sa conference semi-finals series kagahapon, Mayo 16, 2022 (RP time) sa National Basketball Association (NBA) 2021-22 season.
Gipangkastigo sa Mavericks ang host Phoenix Suns, 123-90, aron angkunon ang ikaduhang luna sa Western Conference finals diin naghuwat kanila ang Golden State Warriors.
Napasulod ni All-Star guard Luka Doncic ang nag-una niyang tulo ka mga itsa aron hatagan og sayong labaw ang Mavericks, 8-3.
Human niini, nagsige na lang pagburot ang labaw sa Mavericks hangtod niabot kini og kapin sa 40 ka mga puntos sa 2nd half.
Gipangulohan ni Doncic ang Mavericks pinaagi sa iyang 35 puntos, nihatag og 30 puntos si Spencer Dinwiddle samtang nidugang og 24 puntos si Jalen Brunson.
Sa wala pa magsugod ang duwa, nasayod ang Mavericks nga daghan ang nagtuo nga makatilaw sila og kastigo ming sangkaa hilabi na kay balwarte sa Suns. Tataw nga nahagit og maayo ang Mavericks niini.
“A lot of people said it would be a blowout. They were right,” matod ni Dallas coach Jason Kidd, kinsa mihatod sa Mavericks sa conference finals sa labing unang higayon gikan niadtong 2011.
Ang Suns, nga maoy No. 1 overall team, wala’y sakop nga nakapakita og maayong duwa ning sangkaa.
Gipangulohan ni Cameron Johnson ang Suns pinaagi lang sa iyang 12 puntos, nidugang og 11 puntos si Devin Booker samtang ning-amot og 10 puntos matag usa sila si Chris Paul ug Ish Wainwright.
CELTICS 109, BUCKS 81
Sa Boston, gitangtangan og korona sa Celtics ang defending champion Milwaukee Bucks pinaagi sa pagposte og dominanteng kadaugan.
Ang Celtics ning-abante sa Eastern Conference finals diin ilang ikaharong ang Miami Heat.
Gipangulohan ni Grant Williams ang Celtics pinaagi sa iyang career-high 27 puntos nga gibuwakan og pito ka three-pointers, nidugang og 23 puntos si Jayson Tatum samtang nihatag og 19 puntos si Jaylen Brown.
Ning sangkaa, 22 ka three-point bombs ang gipaboto sa Celtics nga maoy nagpabungog sa Bucks sa kinatibuk-ang duwa.
“I believe in myself, I believe in this team. I expected to play the way I did and for us to respond the way we did,” asoy ni Tatum.
Ang Bucks gipanghulohan ni Giannis Antetokounmpo pinaagi sa iyang 25 puntos, niamot og 21 puntos si Jrue Holiday samtang nihatag og 15 puntos si Brook Lopez. (AP)