MANGTAS.

Mao na ang saktong pulong nga matawag nako sa Cagayan de Oro National High School ni coach Bismark Labadan human gipangpildi nila ang inilang basketball team sa pribadong eskwelahan.

Nihinog ra gayud ang basketball program sa City High human mipakita sa ilang bangis sa Loyola Cup.

Ang City High mao lang nga eskwelahang pampubliko nga nisurprisa sa mao nga liga. Nasilyo na nila ang unang silya ngadto sa crossover round human solong nag-una sa ilang bracket nga adunay 6-1 win-loss record.

Sulod sa ilang bracket, mga inilang mga hulagway ilang gipamildi mao ang Corpus Christi, St. Mary's, Xavier University High School ug bag-ohay lang ang Sacred Heart of Jesus Montessori High School.

Kabalo ko nga adunay usa ka coach gawas ni Labadan nga nagpaluyo sa ilang basketball program. Nakita nako na siya kanunay sa niaging edisyon sa Oro Speed Inter-Public School Basketball League niaging tuig.

Apan, kining tawhana nga usa sab ka coach nihangyo sa tournament director nga si Raul Fuentes nga dili magpa-ila.

Ako, kaila ko kinsa apan respetohan ko ang iyang hangyo isip sa akong pagka manunulat. Apan, ubay-ubay nga mga coach nakamatikod kon kinsa ni siya.

Namunga ra sab ang tumong ug tinguha sa Inter-Public School nga malig-on ang basketball program sa eskwelahang pampubliko. Kana, dili malalis.

Gani, diha nadiskobre sila Milo Janao Jr. sa City diin karon nakuha sa Assumption Montessori School ni coach James Racines. Nahimo pang most valuable player siya sa NBTC Northern Mindanao Regional Finals sa niagi.

Akong gidayeg si Labadan sa akong text ug giingnan nako nga mangtas na kaayo iyang team.

Nitubag lang siya: nakatsamba lang sir (dala katawa).