NAGPUSIL sa kaugalingon ang usa ka bana human nga gibiyaan sa asawa ug ni-uban sa laing lalaki niini niadtong adlaw nga Dominggo sa Liboran, Baungon, Bukidnon.

Patay si Jomar (bansagon gitago), 31, minyo, nagpuyo sa susamang dapit apan nadala pa sa Northern Mindanao Medical Center ning dakbayan sa Cagayan de Oro.

Sa impormasyon giingong naguol ug nasakitan pag-ayo ang biktima gumikan kay gibiyaan kini sa asawa ug mikuyog sa laing lalaki.

Gidugang pa nga posibleng misamot ang kaguol niini sa dihang nasayran nga nanganak na ang asawa diin gipanag-iyahan sa laing lalaki.

Gidugang pa sa ig-agaw sa biktima nga nasamutan pa kini sa dihang nag-away pa ang biktima ug ang inahan niini kalabot na usab sa nasinati-ang problema hinungdan nga nagbahad kini nga magpakamatay ug wala magdugay nakita na lamang kini nga nagbuy-od na human madunggan ang buto sa armas.

Sa pagkakaron, ang maong patay nga lawas ang kasamtangang gi-atiman na sa nahabiling pamilya.