NAGTUO si conditioning coach Alex Ariza nga ang rematch batok kang Mexican legend Juan Manuel Marquez maoy labing maayong away alang sa iyang batos nga si Floyd Mayweather Jr. sa sunod nga tahas niini.

Sa interbyu sa boxingmirror.com, nagkanayon si Ariza nga lehitimong welterweight fighter na karon si Marquez ug sa iyang tan-aw, makahatag na kini og saktong away batok kang Mayweather.

Si Mayweather, kinsa gikan sa unanimous decision nga kadaugan batok kang Manny Pacquiao sa Fight of the Century, gikatakdang moaway og balik karong Septiyembre 12 sa Las Vegas, USA.

Gituohan nga mao na kini ang katapusang away ni Mayweather una siya moretiro sa hingpit.

Unang nag-away sila si Mayweather ug Marquez niadtong 2009 diin yanong midaog ang wala’y pildeng Amerikanong boksidor pinaagi sa unanimous decision.

Ang promoter ni Marquez nga si Fernando Beltran nipabuhagay nga si Mayweather mao ang ilang prayoridad nga kontrahon.

“Obviously we would love to fight Mayweather because while they fought each other already, it took place under very adverse conditions and now things would be different,” matod pa ni Beltran.

Nagkanayon si Ariza nga sa kasamtangan, wala pa naghunahuna si Mayweather kabahin sa sunod niining tahas ug naglingawlingaw pa kini.

Alang kang Ariza, ang brutal nga 6th round knockout nga kadaugan ni Marquez batok kang Pacquiao makatabang og dako aron mahalin ang rematch niini batok kang Mayweather.